لاتىن ءالىپبيىن قازاق ءتىلىنىڭ اۋەزىنە قاراي تاڭبالاۋىمىز قاجەت - عاريفوللا ەسىم
«ءدال قازىر ءبىز لاتىن ءالىپبيىنىڭ ارتىقشىلىعىن سەزبەي وتىرعان شىعارمىز. الايدا ونى قابىلداعاننان كەيىن باسقاشا ويلاي باستايمىز، دۇنيەنى باسقاشا قابىلدايمىز، وزگە حالىقتارمەن اراداعى بايلانىسىمىز جاڭا دەڭگەيگە كوتەرىلەدى. نەگىزى، قازىرگى كەزدە ءبارىمىز دە لاتىن ارىپتەرىن جاقسى بىلەمىز. اعىلشىنشا وقىدىق، نەمىسشە وقىدىق، فرانسۋزشا وقىدىق، ءبارى - لاتىن. ەندىگى ماسەلە، لاتىن ءالىپبيىن قازاق ءتىلىنىڭ فونەتيكاسىنا، اۋەزىنە قاراي تاڭبالاۋىمىز قاجەت. سوندا ءبىز ءوز ءتىلىمىزدىڭ اۋەزدىلىگىن جوعالتپايمىز»، - دەدى عاريفوللا ەسىم بۇگىن «كەلەشەكتىڭ كىلتى - لاتىن ءالىپبيى» اتتى «دوڭگەلەك ۇستەلدىڭ» وتىرىسىندا.
عالىمنىڭ ايتۋىنشا، لاتىن ءالىپبيىن قابىلداعاننان كەيىن كاسىبي ماماندار ءاربىر ءارىپتى حالىقتىڭ ساناسىنا قۇيا ءبىلۋى كەرەك. سوندا ونى تەزدەتىپ ەنگىزۋگە بولادى. «قازىر ەلباسىدان باستاپ ەلدە وتىرعان اعايىنعا دەيىن ارەكەت جاساۋىمىز قاجەت. سەبەبى لاتىن ءالىپبيى - ول مادەني قوزعالىس، رۋحاني قوزعالىس. سەبەبى ەرتەڭ سونىمەن سويلەيمىز، سونىمەن جازامىز، سونىمەن جۇرەمىز»، - دەپ اتاپ كورسەتتى عاريفوللا ەسىم.
ايتا كەتەيىك، بۇگىنگى جيىنعا پروفەسسور ءادىل احمەتوۆ تە قاتىستى. عالىمدار مەكتەپ وقۋشىلارىنا لاتىن ءالىپبيىنىڭ تيىمدىلىگىن جان- جاقتى ءتۇسىندىرىپ بەردى.
اۆتور: ارمان اسقاروۆ
