استانادا سۇرعىلت ءارى ءبىرقالىپتى ۇيلەردىڭ قۇرىلىسى جوسپاردا جوق
«ءبىز قالانى تەگىس بەس جانە توعىز قاباتتى كوپ پاتەرلى ۇيلەردىڭ قۇرىلىسىمەن جوسپارلاپ وتىرعانىمىز جوق. وسى ورايدا سالىناتىن باسپانا ءارتۇرلى ۇلگىدە تۇرعىزىلادى. ءبىرىڭعاي سۇرعىلت نەمەسە ءبىرقالىپتى دەڭگەيدەگى ىقشام اۋداندار بىزدە جوسپارلانباعان. باس جوسپاردىڭ ۇستانىمى بويىنشا ەرەكشە ءبولىپ، سوعان عانا ەكپىن قوياتىنداي ءبىرىڭعاي ورتالىق ەسكەرىلمەگەن. ءبىزدىڭ ايتارلىقتاي جازىق جەر بەدەرىندە وسىنداي ورتالىقتار كوپ. نەگىزگى ماقسات - ولاردى ەرەكشەلەپ كورسەتۋ»، - دەدى باسقارما باسشىسى باقتىباي تايتاليەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ سوزىنە قاراعاندا، قۇرىلىس نىساندارى بيىكتىگى ورتالىقتان شەتكى اۋماقتارعا قاراي تومەندەي بەرەدى. قالاعا كىرەتىن جەتى ماگيسترال بويىنا قۇرىلىس نىساندارى قاراستىرىلعان. الداعى جىلدارى قالا جان- جاقتى باعىتتاردا داميتىن بولادى. وسى ورايدا نەگىزگى باعىتتار رەتىندە شىعىس، وڭتۇستىك جانە باتىس بولىگى، سونداي- اق قالانىڭ ىشىندەگى قايتا سالىناتىن قۇرىلىستار قامتىلماق.
«شىعىس باعىتتا - «مىڭجىلدىق اللەياسى»، ياعني «قازاق ەلى» الاڭىنان جاڭا تەمىر جول ۆوكزالىنا قاراي اۋماق ەسكەرىلگەن. بۇل ءوز كەزەگىندە وتە ۇلكەن اۋماق، 800 گەكتاردى قۇرايدى. ءبىزدىڭ ويىمىزشا، وسى جەردە شامامەن 80 مىڭ ادامعا ارنالعان باسپانا، قىزمەت كورسەتۋ نىساندارى تۇرعىزىلادى. وڭتۇستىك باعىتقا توقتالساق، ماڭگىلىك ەل، قابانباي باتىر، تۇران داڭعىلدارى بويىمەن قۇرىلىس سالۋ كوزدەلگەن. ول اۋماقتا «ەكسپو» كورمەسىنىڭ كەڭىستىگى ورنالاسقان. اتاپ ايتقاندا، وسى جەر قالانىڭ ءۇشىنشى جاڭا ورتالىعى»، - دەدى باسقارما باسشىسى.
مۇنىمەن قوسا ول قالا ىشىندە دە قۇرىلىس جۇمىستارى ءجۇرىپ جاتقانىن، الداعى ۋاقىتتا بۇل جەرلەردە جاڭا نىساندار، مەكتەپتەر جانە بالا باقشالار پايدا بولاتىنىن جەتكىزدى.
اۆتور: رۋسلان عابباسوۆ
