ارميان فوتوگرافى نۇرسۇلتان نازاربايەۆقا ءوزىنىڭ تانىمال تۋىندىسىن سىيلاماق

استانا. قازاقپارات - ارمەنيا پرەزيدەنتى داۆيد اكوپياننىڭ جەكە فوتوگرافى ءوزىنىڭ كەڭىنەن تانىلعان تۋىندىسىن ق ر پرەزيدەنتى نۇرسۇلتان نازاربايەۆقا سىيعا تارتپاقشى، دەپ حابارلايدى «قازاقپارات» ح ا ا ءتىلشىسى.

  داۆيد اكوپيان نۇرسۇلتان نازاربايەۆتى قالاي ءساتتى راكۋرستا سۋرەتكە تۇسىرگەنىن ايتىپ بەردى.

«ءبىز مەملەكەت باسشىلارىنىڭ كەزدەسۋ ءۇشىن زالعا وتكەنىن كۇتتىك. وسى كەزدە سول جەردەن باسقا جۇمىسشىلار ءوتىپ جاتقاندىقتان، ءوزىم ءۇشىن جارىقتى رەتتەدىم»، - دەپ اتاپ ءوتتى ول.

 داۆيد اكوپيان جەتى جىلدان بەرى ارمەنيا پرەزيدەنتىنىڭ جەكە فوتوگرافى بولىپ جۇمىس ىستەيدى جانە ونىڭ بارلىق كەزدەسۋلەرىنە، سونىڭ ىشىندە قازاقستان پرەزيدەنتىمەن بىرگە وتكەن ءىس- شارالارعا دا قاتىسىپ كەلەدى.

«مەن قانداي فوتوكادر الاتىنىمدى كوز الدىما ەلەستەتتىم، ءبىراق ءدال وسىلاي سۋرەتكە تۇسىرەمىن دەپ ويلاعان جوقپىن. شىنىمدى ايتسام، مىنا سۋرەت ماعان قاتتى ۇنايدى»، - دەدى ارميان فوتوگرافى.

داۆيد اكوپيان نۇرسۇلتان نازاربايەۆتىڭ سۋرەتىن كەشە كەشكە ءوزىنىڭ Facebook پەن Instagram پاراقشاسىنا جاريالادى.

 «بۇل سۋرەتتى ينتەرنەتتە وسىلاي تاراپ كەتەدى دەپ ويلاماپپىن. بۇگىن تاڭەرتەڭ ويانعاندا بۇكىل قازاقستانعا تانىمال بولدىم. قازىر مەنىڭ Facebook-تەگى پاراقشامدا ارمياندىقتاردان گورى قازاقستاندىق دوستارىمنىڭ سانى كوپ»، - دەدى ول.

 تاڭەرتەڭنەن بەرى فوتوگرافقا قازاقستاندىق جۋرناليستەر حابارلاسىپ جاتىر ەكەن. داۆيد اكوپياننىڭ تۇسىرگەن سۋرەتى ارمياندىق ارىپتەستەرىنىڭ دە، فرانسۋز جۋرناليستەرىنىڭ دە قىزىعۋشىلىعىن تۋدىرعان. «مەن بۇل سۋرەتتى نۇرسۇلتان نازاربايەۆقا سىيعا تارتقىم كەلەدى»، - دەپ مالىمدەدى ارمەنيا پرەزيدەنتىنىڭ جەكە فوتوگرافى. داۆيد اكوپيان تاياۋدا بولاتىن ءىس- شاراعا ءوز ەلىنىڭ پرەزيدەنتىمەن بارعان كەزدە بۇل تۋىندىسىن سىيعا تارتپاقشى.