تۋريستەر ءۇشىن الماتىدا دەمالۋ قۇنى قانشا تۇرادى
الەمدەگى ەڭ ءىرى «TripAdvisor» تۋريستىك سايتىنىڭ مالىمەتتەرىنە سۇيەنسەك، الماتى ەكو- تۋريزم تاراۋى بويىنشا تۋريستەردىڭ قىزىعۋشىلىعىن تۋدىرىپ وتىر. تۋريستىك اقپارات ورتالىعى ماماندارى مەگاپوليس ءتۋريزمىنىڭ ودان باسقا دا تارماقتارى بويىنشا سۇرانىستى ارتتىرۋعا بولاتىنىنا سەنىمدى. «البەتتە، قازاقستاندا بۇقارالىق تۋريزم دامىعان دەپ ايتا المايمىز. ءبىز تۇركيامەن، ونىڭ ميلليونداعان تۋريستەر لەگىمەن باسەكەلەسە المايمىز. تۋريستەر قاتارى ارتقان سايىن باعا دا ارزاندايدى. سوندىقتان، ايتۋلى تۋريستىك باعىتتار بويىنشا ءبىزدىڭ ەلدە دەمالىس، ءتىپتى جەرگىلىكتى تۇرعىندار ءۇشىن دە ارزان بولماي وتىر. ءبىزدى ورتالىق ازيا ەلدەرىمەن ءجيى سالىستىرىپ جاتادى. ءبىراق بىزدە ءومىر ءسۇرۋ دەڭگەيى جوعارى ەكەنى انىق. سوندىقتان، قىرعىزستان مەن وزبەكستانعا قاراعاندا بىزدە باعا جوعارى» ، - دەدى تۋريستىك اقپارات ورتالىعىنىڭ ديرەكتورى اسەل نۇركەبايەۆا.
ونىڭ ايتۋىنشا، الماتى قالاسىندا ەڭ تومەنگى باعالارمەن ەسەپتەگەندە 7 كۇندىك دەمالىس 250-300 دوللار تۇرادى. ونىڭ ىشىندە، جاتىن ورىن، تاماقتانۋ، قالا ىشىندە قىدىرۋ بار. «ارينە، ەگەر ساياحاتشى حوستەل ەمەس، قوناق ۇيگە تۇسەتىن بولسا، وندا باعا جوعارى بولادى. بۇل باعاعا كەلۋشىنىڭ جول قۇنىن قوسىپ وتىرعانىمىز جوق. ۇشۋ باعاسىن قوسقاندا ا ق ش نەمەسە كانادادان كەلەتىن قوناققا الماتىدا 7 كۇن دەمالىپ كەتۋ ەڭ از دەگەندە 2000 دوللار بولادى. ول شىعىننىڭ 90 پايىزى ۇشاققا كەتەدى. ال پويىزبەن نەمەسە كولىكپەن كەلە الاتىن رەسەي مەن ورتالىق ازيا تۋريستەرىنە باعا ارزانىراق بولادى» ، - دەدى اسەل نۇركەبايەۆا.
استانادا ەكسپو- نىڭ، الماتىدا قىسقى ۋنيۆەرسيادانىڭ ءوتۋى تۋريستەر لەگىنىڭ ارتۋىنا ىقپال ەتتى. الماتى اۋەجايىنىڭ مالىمەتتەرىنە سۇيەنسەك، بيىلعى 7 اي ىشىندە بىلتىرعى سايكەس كەزەڭمەن سالىستىرعاندا كوشپەلى تۋريزم كورسەتكىشى 22 پايىزعا ارتقان. الماتى قالاسى ستاتيستيكا دەپارتامەنتىنىڭ مالىمەتتەرىندە قالادا تۋريستەردى ورنالاستىراتىن ورىندار سانى 25 پايىزعا، وندا كورسەتىلەتىن قىزمەت كورسەتكىشى 18 پايىزعا ارتقانى جازىلعان. ايتا كەتەيىك، 8-13 قازان كۇندەرى گونكونگ، رەسەي، سينگاپۋر، مالايزيا، قىرعىزستان، وزبەكستان سىندى ەلدەردىڭ 20 تۋريستىك كومپانياسىنىڭ وكىلدەرىنە الماتىنى تانىستىرۋ ءۇشىن اقپارات- تانىسۋ ساياحاتىن ۇيىمداستىرعان.
اۆتور: الماس مۇقاش ۇلى
