تارازدا كوشى- قون پوليتسياسىنىڭ ەكى قىزمەتكەرى جانە ءۇش ازامات سوتتالدى

تاراز. قازاقپارات - تارازدا كوشى- قون زاڭدىلىعىن بۇزۋعا كۇدىكتى ەكى پوليتسەي مەن ءۇش ازاماتتىڭ قىلمىستىق ءىسىن قاراۋ اياقتالدى، دەپ حابارلايدى «قازاقپارات» ح ا ا ءتىلشىسى جامبىل وبلىستىق سوتتىڭ باسپا ءسوز قىزمەتىنە سىلتەمە جاساپ.

 تاراز №2 سوتى تاراز ءى ءى ب كوشى- قون پوليتسياسىنىڭ ءبولىم باستىعى مەن ينسپەكتورى اسقان زەيداليەۆ جانە رۋسلان قاسىموۆتى، سونداي- اق وبلىس تۇرعىندارى رۋسلان وسەروۆ، بارشا وسەر جانە ءلايلا بەيسەنبايەۆالاردى ايىپتى دەپ تاپتى.

«ءىس ماتەريالدارى بويىنشا لاۋازىمدى تۇلعالار زەيداليەۆ پەن قاسىموۆ قىزمەتتىك وكىلەتتىكتەرىن اسىرا پايدالانعان. ولار پايدا تابۋ ماقساتىمەن وسەروۆ، وسەر جانە بەيسەنبايەۆالارمەن الدىن الا كەلىسىپ، قىتاي، قىرعىزستان، وزبەكستان جانە رەسەي ازاماتتارىنىڭ، جالپى 609 ادامنىڭ كوشى- قون قۇجاتتارىن زاڭسىز راسىمدەگەن».

جامبىل وبلىستىق سوتىنىڭ باسپا ءسوز قىزمەتىنەن الىنعان مالىمەتتەرگە قاراعاندا، سوتتالۋشىلار شەتەل ازاماتتارىنا ەڭبەك قىزمەتىمەن اينالىسۋعا زاڭسىز رۇقسات قاعازىن، ۋاقىتشا تىركەۋ قۇجاتىن، تىركەۋ قۇجاتىن، تۇراقتى تۇرۋ ىقتيارحاتىن بەرگەن. سوت ۇيىمداسقان قىلمىستىق ءىستى مەملەكەتتىك قىزمەت، مەملەكەتتىك باسقارۋ جانە باسقارۋ تارتىبىنە قايشى سىبايلاس قۇقىق بۇزۋشىلىق دەپ سانايدى.

زاڭسىز بەرىلگەن قۇجاتتار شەتەل ازاماتتارىنا رەسپۋبليكا اۋماعىنا كەلۋگە، كەتۋگە، ەلدە زاڭسىز تۇرۋعا، كوشۋگە، باسقا دا قىزمەتتەرمەن اينالىسۋعا مۇمكىندىك بەرگەن.

سوتتالۋشىلار وزدەرىنە تاعىلعان ايىپتى مويىندامادى. سوت قازاقستان رەسپۋبليكاسى قىلمىستىق كودەكسىنىڭ بىرنەشە بابى بويىنشا تاراز ءى ءى د كوشى- قون پوليتسياسىنىڭ ءبولىم باستىعى، پوليتسيا پودپولكوۆنيگى اتاعىنان ايىرىلعان اسقان زەيداليەۆتى ون جىلعا باس بوستاندىعىنان ايىرۋ جازاسىنا كەستى. ول جازانى قىلمىستىق- اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەيدى. بۇدان تىس، ونىڭ يەلىگىندەگى قىلمىستىق جولمەن العان نەمەسە قىلمىستىق جولمەن تابىلعان اقشاعا العان مۇلىكتەرى تاركىلەندى. ونىڭ ءومىر بويى مەملەكەتتىك قىزمەتتە لاۋازىم يەلەنۋىنە تىيىم سالىندى. راقىمشىلىققا سايكەس، جازا مەرزىمى 7 جىل، 6 اي، 4 كۇنگە دەيىن قىسقارتىلدى.

تاراز ءى ى د كوشى- قون پوليتسياسىنىڭ بۇرىنعى ءبولىم ينسپەكتورى رۋسلان قاسىموۆقا پوليتسيا كاپيتانى اتاعىنان ايىرىپ، قازاقستان رەسپۋبليكاسى قىلمىستىق كودەكسىنىڭ بىرنەشە بابىمەن 4 ميلليون 242 مىڭ تەڭگە مولشەرىندە ايىپپۇل بەلگىلەندى. ونىڭ يەلىگىندەگى جەكە مۇلكى تاركىلەنىپ، ءومىر بويى مەملەكەتتىك قىزمەتتە لاۋازىم يەلەنۋىنە تىيىم سالىندى.

وسەروۆ قازاقستان رەسپۋبليكاسى قىلمىستىق كودەكسىنىڭ 394-بابى، 2-بولىگىمەن 5 جىلعا باس بوستاندىعىنان ايىرىلدى، وعان وسىنداي مەرزىمدە پروباتسيالىق باقىلاۋ بەلگىلەندى. ول ءۇش جىلعا يمميگرانتتارعا قىزمەت كورسەتۋ قۇقىعىنان ايىرىلدى. تۇراقتى جۇمىس ورنى بولماسا، ول جەرگىلىكتى بيلىك ورگاندارى انىقتايتىن جەرلەردە ءماجبۇرلى ەڭبەككە تارتىلادى.

بارشا وسەر جازادان قۇتىلدى. وعان ق ر ق ك بىرنەشە بابى بويىنشا مۇلكىن تاركىلەپ، ەكى جىلعا باس بوستاندىعىنان ايىرۋ، ءومىر بويى مەملەكەتتىك قىزمەتتە لاۋازىم يەلەنۋ جانە يمميگرانتتارعا قىزمەت كورسەتۋ قۇقىعىنان ايىرۋ جازاسى بەلگىلەنگەن بولاتىن. راقىمشىلىق بويىنشا ول جازادان بوساتىلدى.

ءلايلا بەيسەنبايەۆاعا بەلگىلەنگەن ق ر ق ك 394-بابى، 2-بولىگىمەن 5 جىلعا باس بوستاندىعىنان ايىرۋ، 5 جىلعا يمميگرانتتارعا قىزمەت كورسەتۋ قۇقىعىنان ايىرۋ جازاسى راقىمشىلىقپەن الماستىرىلدى.

سوتتىڭ ۇكىمى زاڭدى كۇشىنە ەنگەن جوق.