قازاقستاندىقتار قاي ايىپپۇلدىڭ كولەمىن تىم جوعارى سانايدى
بۇل تۋرالى بۇگىن «نۇر وتان» پارتياسى جانىنداعى قۇقىقتىق كەڭەستىڭ «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلاردىڭ وزەكتى ماسەلەلەرى» تاقىرىبىنداعى دوڭگەلەك ۇستەل وتىرىسىندا پارتياسى حاتشىسى ناتاليا گودۋنوۆا ايتتى، دەپ حابارلايدى قازاقپارات.
ونىڭ ايتۋىنشا، «نۇر وتان» پارتياسىنىڭ قوعامدىق قابىلداۋ بولمەسىنە ازاماتتاردىڭ باسىم بولىگى نەگىزىنەن ەكى ماسەلە بويىنشا جۇگىنەدى. ونىڭ ءبىرى جول قوزعالىسى ەرەجەسى سالاسىنداعى ايىپپۇلداردىڭ كولەمىنە، ال ەكىنشىسى لاۋازىمدى تۇلعانىڭ ارەكەتىنە نەمەسە ارەكەتسىزدىگىنە قاتىستى بولىپ كەلەدى.
«سونىمەن قاتار ازاماتتار تارابىنان بۇگىنگى كۇنگى قولدانىستاعى ايىپپۇل كولەمدەرىنىڭ حالىقتىڭ تابىس كولەمىمەن سايكەستىگىنە قاتىستى ماسەلەلەر ءجيى كوتەرىلەدى. ايتپاقشى، بۇل پروبلەما زاڭ جوباسىندا دا كورىنىس تاۋىپ وتىر. وسى ماسەلەگە بايلانىستى «نۇر وتان» پارتياسى جانىنداعى ساياسي ساراپتامالار جانە الەۋمەتتىك زەرتتەۋلەر ورتالىعى ارنايى پسيحولوگيالىق زەرتتەۋ جۇرگىزدى»، - دەدى گودۋنوۆا.
پارتيا حاتشىسى جاريا ەتكەن اتالعان زەرتتەۋ ناتيجەلەرىنە سايكەس، حالىقتىڭ پايىمىنشا، ءۇش بۇزۋشىلىققا قاتىستى ايىپپۇلداردىڭ كولەمى تىم جوعارى.
«ءبىرىنشىسى - جول ءجۇرۋ ەرەجەسىن بۇزۋ. ساۋالناماعا قاتىسۋشىلاردىڭ 55 پايىزى وسىلاي دەپ جاۋاپ بەرگەن. ياعني، ەلىمىزدىڭ ءاربىر ەكىنشى تۇرعىنى ايىپپۇل كولەمى جوعارى دەپ سانايدى. ەكىنشىسى - سالىق زاڭناماسىن بۇزۋ. بۇل - 35 پايىز. بۇل پىكىردى ءاربىر ءۇشىنشى ازامات بىلدىرگەن. ال ءۇشىنشىسى - رۇقسات ەتىلمەگەن جەردە ىشىمدىك ءىشۋ، شىلىم شەگۋ. ساۋالناماعا قاتىسۋشىلاردىڭ 35 پايىزى نەمەسە ءاربىر ءۇشىنشى قازاقستاندىق ايىپپۇل كولەمى تىم جوعارى جاۋاپ بەرگەن»، - دەدى پارتيا حاتشىسى.
