قىرعىز اكتەرلارى دوسحان جولجاقسىنوۆتى ولتىرمەكشى بولعان
«استانا» ارناسىنىڭ «سىرلاسۋ» باعدارلاماسىنا سۇحبات بەرگەن اكتەر ۇلدارىنا ەرتەگى ۇيرەتكەننىڭ ارقاسىندا ءبىر اجالدان امان قالعانىن ايتتى.
جارى قاراكوز سۇلەيمەنوۆانىڭ ايتۋىنشا، دوسحان جولجاقسىنوۆ كىشى ۇلى بەكزاتقا 12 جىل بويى ۇيىقتار الدىندا ەرتەگى وقىپ وتىرعان. جارىنىڭ سوزىنە ماساتتانىپ كەتسە كەرەك-تى، اكتەردىڭ ءوزى «العاش قازاق توپىراعىندا ەرتەگى جازعان مەن بولدىم» دەپ ماقتاندى.
«بالام ەرتەگى تىڭداماي ۇيىقتامايتىن. ءبىر جىلدارى سول ەرتەگىگە ۇيرەتكەننەن ءبىر اجالدان ءتىرى قالدىق. قىرعىزستاندا كينوعا ءتۇسىپ، قىرعىزدىڭ اكتەرلارى كورە الماي، ءبىز جاتقان كيىز ۇيگە قاستاندىق جاساعان. اركىمنىڭ جاتاتىن كيىز ءۇيى بار، مەن وتباسىممەن ءبىر كيىز ۇيدە... مەن تۇنگى ساعات 11-دە كيىز ۇيگە كىردىم، ەرتەڭگى ءتۇسىرىلىمدى سويلەسەمىز دەپ ۋاقىت كەتتى، كەلسەم بالام ءبىرجانىم ۇيىقتاماي جاتىر «ەرتەگى ايتشى» دەپ... سودان ۇيىقتاماي ەرتەگىنى ايتىپ جاتىرمىن. تاۋدىڭ بوكتەرى، تازا اۋا. ۇيقى دەگەن اكەتىپ بارا جاتىر. قالعىپ كەتسەم قايتادان وياتادى، «پاپا، ءارى قاراي» دەپ...
ءسويتىپ جاتقاندا پەشتەن ءتۇتىن بۇرقىراپ شىعا باستادى. قاقالىپ-شاشالىپ، بالا-شاعا ءبارىمىز دالاعا شىقتىق. سىرتتاعىلار «ويباي، نە بولدى؟» دەيدى. «وسىلاي پەش ىستەمەي جاتىر» دەيمىز. ەلدىڭ ءبارى ءار جۇمىسپەن كەتكەن كەزدە، كەرەگەگە ورمەلەپ، مۇرجاعا قولىمدى تىقسام، جابىق. سودان بىرەۋىن سۋىرامىن، ەكىنشىسىن سۋىرام. سول كۇنى اياعىمىزعا ءبولىپ بەرگەن ءتورت شىلعاۋدى تىعىپ ۇلگەرىپتى. سول مەنىڭ جاتقانىمدى كۇتىپ تۇر عوي. مەن جاتقاننان كەيىن، مۇرجاعا ءتورت شىلعاۋدى تىققان. ەندى بالام ۇيىقتاپ جاتسا، مەن بىرگە كەتەتىن ەدىم ۇيقىعا. ءبارىمىز يىستەن ءولىپ كەتەتىن ەدىك. سول ەرتەگى ۇيرەتكەنىمنىڭ ارقاسىندا ءتىرى قالدىق»، - دەپ ەسكە الدى اكتەر.
