استانادا «اقمول» ساۋدا جەلىسى اشىلادى

كوكشەتاۋ. قازاقپارات - اقمولالىقتار ەلوردادا جاڭا ساۋدا نۇكتەلەرىن اشۋ ارقىلى تۇرعىنداردىڭ اۋىل شارۋاشىلىعى تاۋارلارىنا قولجەتىمدىلىگىن ارتتىرماق.

اتالعان شارا ەلباسى نۇرسۇلتان نازاربايەۆتىڭ «استانا قالاسى اينالاسىنداعى ازىق-تۇلىك بەلدەۋى» باعدارلاماسىن جۇزەگە اسىرۋ شەڭبەرىندە قولعا الىنىپ وتىر، دەپ حابارلايدى قازاقپارات ءتىلشىسى.

وبلىس اكىمىنىڭ باسپا ءسوز قىزمەتىندەگىلەر بەرگەن مالىمەتتەرگە قاراعاندا جوبانى 2 كەزەڭ بويىنشا جۇزەگە اسىرۋ قاراستىرىلعان.

«بيىلعى جىلى اقمولا وبلىسىنىڭ برەند تاۋارلارى استاناداعى ءۇش ساۋدا ورنىندا ساتىلاتىن بولادى. كەلەر جىلى كوتەرمە جانە بولشەك ساۋدا نۇكتەلەرىنىڭ سانىن 10-عا جەتكىزۋ كوزدەلگەن» ، - دەدى «ەسىل ءا ك ك» ۇك» ا ق باسقارما ءتوراعاسى قازبەك ەسكەندىروۆ.

استاندا العاشقى «AQMOL» ساۋدا نۇكتەسىن اعىمداعى جىلدىڭ قاراشا ايىندا ر. قوشقاربايەۆ داڭعىلىندا اشۋ جوسپارلانعان.

مۇنداعى ءاربىر ساۋدا ورنىنىڭ كولەمى 200-500 شارشى مەتر كولەمىندە بولادى. دۇكەن سورەلەرىن جەرگىلىكتى ونىممەن قامتاماسىز ەتۋ ءۇشىن بولشەك ساۋدا ورتالىعى قۇرىلادى.

«وندا تۇرعىندار ەش قوسپاسىز ساپالى ءونىم ساتىپ الا الادى»، دەدى قازبەك ەسكەندىروۆ.

وسى ماقساتتا «اقمول» ساۋدا ءۇيى» ج ش س قۇرىلدى. وعان «رودينا» اگروفيرماسى» ج ش س، «يجيەۆسكي» و ك، استانا اگرو پرودۋكت» ج ش س، CAPITAL PROJECTS LTD»  ج ش س، «گورمولزاۆود» ج ش س، «اينا» ساۋدا ءۇي» ج ش س ءتارىزدى ءسۇت جانە باسقا ونىمدەرىن وندىرەتىن وڭىردەگى كاسىپورىندار كىرەدى.

«الداعى ۋاقىتتا تاۋار وندىرۋشىلەر قاتارى ارتاتىن بولادى. ءوزىمىزدىڭ ساۋدا جەلىسىن قۇرۋ استانالىقتارعا ساپالى ءارى ارزان باعامەن ءونىم جەتكىزۋگە مۇمكىندىك بەرەدى»، دەپ ءسوزىن تۇيىندەدى قازبەك ەسكەندىروۆ.