قازاقستانداعى بوكس ەرەجەلەرىنە ءبىرقاتار وزگەرىستەر ەنگىزىلدى

استانا. قازاقپارات - قازاقستان بوكس فەدەراتسياسىنىڭ شەشىمىمەن ۇيىم جارىستارىنا قاتىسپايتىن سپورتشىلار الەم چەمپيوناتتارىنا بارا المايدى، دەپ حابارلايدى قازاقپارات ءتىلشىسى.

 «ءبىز اتقارۋشى كوميتەتتىڭ بيۋروسىندا وسىنداي شەشىم قابىلدادىق. بۇگىندە كەيبىر وبلىستىق اكىمدىكتەر قازاقستاننىڭ بوكس فەدەراتسياسى كۋبوگىنا قاتىسۋعا ءوز كوماندالارىنا اقشا بەرمەي وتىرادى. ەندى، فەدەراتسيا كۋبوگىنا قاتىسپايتىن سپورتشىلار الەم چەمپيوناتتارىنا جولداما الا المايدى. سوندىقتان فەدەراتسيا جەتەكشىلەرىنە ايتارىم، وسىنى وبلىستىق سپورت باسقارماسى باسشىلارىنا جەتكىزىپ بارىڭدار. كوماندالار كۋبوكقا قاتىسۋى ءتيىس» ، - دەدى ق ب ف پرەزيدەنتى تيمۋر ق ۇلىبايەۆ بۇگىن ۇيىمنىڭ جىل سايىنعى كونفەرەنتسياسىندا.

 بۇگىنگى شارا اياسىندا باپكەرلەر مەن بوكس سالاسىنىڭ ءبىرقاتار ماماندارى ماراپاتتالدى. اتاپ ايتقاندا، «قازاقستان بوكسىن دامىتۋداعى ەڭبەگى ءۇشىن» اتاعىنا ق ب ف ۆيتسە- پرەزيدەنتى دانيار ابىلعازين، ۇيىم باسشىسىنىڭ باپكەرلەر شتابىمەن جۇمىس جونىندەگى ورىنباسارى يۋري سحاي، مەملەكەتتىك باپكەر بولات ءابدىراحمانوۆ، باس باپكەر مىرزاعالي ايتجانوۆ، ايەلدەر بوكسى بويىنشا مەملەكەتتىك باپكەر قايرات ماناشيەۆ، ايەلدەر قۇرامىسىنىڭ باس باپكەرى ۆاديم پريسياجنيۋك جانە بوكس تاريحىن جازىپ جۇرگەن قاسىم ماۋلەنوۆ يە بولدى. ال «قازاقستان بوكسىنىڭ ارداگەرى» ماراپاتى قازاق ك س ر باپكەرى اندرەي رايش، قازاقستاننىڭ ەڭبەگى سىڭگەن باپكەرلەرى - بوريس تسحيراشۆيلي، فەليكس تسوي، ۆلاديمير شايرەر مەن الماتى وبلىستىق فەدەراتسياسىنىڭ قۇرمەتتى پرەزيدەنتى اسقار- ءماديحان ساۋدانبەكوۆكە تابىستالدى.

 

اۆتور: ارمان اسقاروۆ