قازاقستاندا اسكەري قىزمەتشىلەرگە اجىراسقان ءتيىمسىز بولادى

استانا. قازاقپارات - ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين اسكەريلەردى باسپانامەن قامتاماسىز ەتۋدە ۇسىنىلىپ وتىرعان جاڭاشىلدىقتارعا قاتىستى ءازىل ايتتى، دەپ حابارلايدى قازاقپارات.

ايتا كەتەيىك، پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى. «زاڭ جوباسىنىڭ باستى ماقساتى - باسپاناعا مۇقتاج بارلىق اسكەريلەردى تۇرعىن ۇيمەن قامتاماسىز ەتۋگە نەگىزدەلگەن. ومىردە ءتۇرلى جاعدايلار ورىن الادى. اجىراسقان جاعدايدا اسكەري قىزمەتشىنىڭ زايىبىنا تۇرعىن ءۇي تولەمدەرى توقتاتىلادى، سەبەبى ول وتباسى مۇشەسى قۇرامىنان شىعارىلادى. ال نەكە بۇزىلعانعا دەيىن جاسالعان تولەمدەردىڭ بارلىعى ورتاق جينالعان مۇلىك بولعاندىقتان، ورتاق نەگىزدە بولىنەدى. سوندىقتان اسكەري قىزمەتشىلەرگە اجىراسقان ءتيىمسىز بولادى، ويتكەنى تولەمدەردىڭ سوماسى ايتارلىقتاي ازايىپ قالادى» ، - دەدى ق ر قورعانىس ءمينيسترىنىڭ تالعات مۇحتاروۆ.

سونىمەن قاتار ت. مۇحتاروۆقا «ەگەر ەرلى- زايىپتىلار اسكەري قىزمەتشىلەر بولعان جاعدايدا، ولاردىڭ قايسىسىنا تولەم جاسالادى» دەگەن ساۋال قويىلدى. وسى ورايدا ول وتباسىندا تۇرعىن ءۇي تولەمدەرى ەرلى- زايىپتىلاردىڭ بىرەۋىنە عانا راسىمدەلەتىنىن اتاپ ءوتتى. تالقىلاۋلار كەزىندە ءوز كەزەگىندە ءماجىلىس ءتوراعاسى نۇرلان نىعماتۋلين ءازىلىن ايتا كەلە: «تالعات ءسابيت ۇلى وسى مىنبەردە تۇرىپ «اسكەريلەرگە تۇرمىسقا شىعىڭدار، ولار بۇيرىقپەن بارلىعىن ىستەيدى» دەگەن ۇندەۋ جاسادى» ، - دەدى.

بۇدان بۇرىن حابارلانعانداي، زاڭ جوباسىنىڭ ماقساتى مەن ماڭىزى باسپاناعا مۇقتاج بولعان بارلىق اسكەري قىزمەتشىلەردىڭ ساناتتارىن ءتول تۇرعىن ۇيمەن قامتاماسىز ەتۋ بولىپ تابىلادى. قاراستىرىلىپ وتىرعان تەتىكتەرگە توقتالساق، اسكەري قىزمەتشىلەرگە ەكىنشى دەڭگەيلى بانكتەردەگى جەكە ارناۋلى ەسەپ- شوتىنا اي سايىن تۇرعىن ءۇي تولەمدەرى اۋدارىلاتىن بولادى. تۇرعىن ءۇي تولەمدەرىنىڭ مولشەرى ەلىمىزدىڭ ءتيىستى وڭىرىندەگى باسپانانىڭ 1 شارشى مەتر قۇنىن اسكەري قىزمەتشى وتباسى مۇشەلەرىنىڭ ءارقايسىسىنا تيەسىلى پايدالى اۋدان نورمالارىنا، ياعني ءبىر ادامعا شاققاندا 18 شارشى مەترگە كوبەيتۋ ارقىلى ەسەپتەلەدى. بۇدان بولەك، 2018 -جىلى باسپاناسىز اسكەري زەينەتكەرلەرگە ءبىرجولعى اقشالاي وتەماقى بەرۋ ەسكەرىلگەن. قازا تاپقان اسكەريلەردىڭ وتباسىلارى دا جاڭا باسپانا الادى. جالپى، قارۋلى كۇشتەردىڭ جانە بارلىق كۇش قۇرىلىمدارى ورگاندارىنداعى باسپاناسىز جۇرگەن 60 مىڭنان استام اسكەري قىزمەتشىلەردىڭ تۇرعىن ءۇي ماسەلەسىن شەشۋ قاراستىرىلىپ وتىر.

اۆتور: رۋسلان عابباسوۆ