لاتىن ءالىپبيى ورىسشا ويلاۋدان قۇتىلۋعا كومەكتەسەدى - بۇركىتباي اياعان

استانا. قازاقپارات - ق ر ءبىلىم جانە عىلىم مينيسترلىگىنە قاراستى مەملەكەت تاريحى ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور بۇركىتباي اياعاننىڭ ايتۋىنشا، لاتىن ءالىپبيى ارقىلى تۋعان ءتىلىمىز ەركىندىك الىپ، ورىسشا ويلاۋدىڭ قۇرساۋىنان قۇتىلۋعا مۇمكىندىك تۋادى، دەپ حابارلايدى قازاقپارات ءتىلشىسى.

«بىرىنشىدەن، لاتىن ءالىپبيىنىڭ سوڭعى نۇسقاسى 32 ارىپتەن تۇرادى. بۇرىننان كەلە جاتقان كەيبىر ارىپتەر ءتۇسىپ قالسا دا، وعان رەنجيتىن ەشتەڭەسى جوق. قايتا ءوز ءتىلىمىز ءتول قالپىنا ءتۇسىپ، تۇلەپ شىعا كەلەدى. بۇل جەردە ماڭىزدى ءبىر ماسەلەنى ەسكەرۋ كەرەك، قازىر قولدانىپ جۇرگەن لاتىن ارىپتەرىمەن سىرتقا شىعا المايمىز. ويتكەنى كومپيۋتەر قابىلدامايدى. سوندىقتان حالىقارالىق تالاپتارعا باعىنۋعا ءماجبۇر بولدىق»، - دەدى اياعان قازاقپارات تىلشىسىنە بەرگەن سۇحباتىندا.

عالىمنىڭ ايتۋىنشا، سوڭعى 70-75 جىلدا ءبىز ورىسشا ويلاپ، ءوز ءتىلىمىزدى كيريلليتسا ارقىلى باعالايتىن جاعدايعا جەتتىك. بۇل - وتە قاۋىپتى جاعداي. ال لاتىن ءالىپبيى تۋعان تىلىمىزگە ەركىندىك، بۇرىنعى قۇرساۋدان شىعۋعا مۇمكىندىك بەرگەلى وتىر.

«ەكىنشى ءبىر ماسەلە، پرەزيدەنتكە كورسەتىلگەن نۇسقاداعى ارىپتەر قولدانۋعا وتە ىڭعايلى. حات تا، شىعارما دا جازۋعا بولادى. وزگە ەلدەرمەن ارالاسۋعا جاعداي جاسايدى. ۇشىنشىدەن، لاتىن ءالىپبيى باياعى ءتىل تاريحىمىزعا، رۋحاني جاڭعىرۋمىزعا اكەلەدى. ەڭ باستىسى، ءبىز بۇل باستاماعا ۇلكەن دايىندىقپەن كەلىپ وتىرمىز»، - دەپ اتاپ كورسەتتى بۇركىتباي اياعان.