باقىتجان ساعىنتايەۆ قاراعاندى وبلىسى اكىمىنە: كومىر توڭىرەگىندەگى دۇربەلەڭگە حالىق كىنالى مە

استانا. قازاقپارات - بۇگىن ۇكىمەتتىڭ سەلەكتورلىق رەجيمدەگى وتىرىسىندا پرەمەر- مينيستر باقىتجان ساعىنتايەۆ قاراعاندى وبلىسىنىڭ اكىمى ەرلان قوشانوۆقا كومىر توڭىرەگىندە تۋىنداپ وتىرعان پروبلەمالاردى شەشۋدى تاپسىردى، دەپ حابارلايدى قازاقپارات.

وتىرىس بارىسىندا پرەمەر- مينيستر كومىرلى ءوڭىر قاراعاندىنىڭ وزىندە ۇزىن- سونار كەزەكتىڭ ورىن العانىن ايتىپ، ونىڭ سەبەبىن ءوڭىر باسشىسى ەرلان قوشانوۆتان سۇراعان ەدى.

 «الەۋمەتتىك نىسانداردى كومىرمەن قامتاماسىز ەتۋدە وبلىستا پروبلەما جوق. كومىر تولىق كولەمدە جەتكىزىلگەن. الايدا حالىقتى كومىرمەن قامتاماسىز ەتۋدەگى دۇربەلەڭ ساقتالۋدا. وسى جىلدارعا دەيىن وبلىس تۇرعىندارى كومىردى قازان ايىندا ساتىپ الاتىن. ءبىراق بيىل جىلىتۋ ماۋسىمى 27 - قىركۇيەكتە باستالىپ كەتتى»، - دەدى ول.

وسى ورايدا ونىڭ ءسوزىن بولگەن باقىتجان ساعىنتايەۆ: «ەرلان جاقان ۇلى، سىزشە، سوندا حالىق كىنالى بولعانى ما؟ ولار بۇرىن قازاندا السا، بيىل قىركۇيەكتەن باستاپ، كومىر ساتىپ الا باستاعان. سولاي بولعانى ما؟»، - دەدى باقىتجان ساعىنتايەۆ.

ال ەرلان قوشانوۆ وڭىردەگى اۋا تەمپەراتۋراسىنىڭ كۇرت تومەندەۋ سالدارىنان كومىرگە سۇرانىس ارتىپ، دۇربەلەڭ باستالىپ وتىرعانىن ايتىپ اقتالدى.

 «باقىتجان ءابدىر ۇلى، حالىق الدىن الا كومىر ساتىپ المايدى. سەبەبى، وندا جاتىپ قالعان كومىردىڭ ساپاسى تومەندەيدى. ءبىز ءتيىستى ساراپتاما جۇرگىزگەن دە ەدىك. جىل سايىن قازان ايىندا كومىردى ساتىپ الاتىنبىز. وسى جىلى 27 - قىركۇيەكتە جىلىتۋ ماۋسىمى باستالىپ وتىر. ءبىراق كومىر وندىرۋدە پروبلەما جوق. اعىمداعى جىلدىڭ 9-ايىندا 22 ميلليون توننا كومىر ءوندىرىلىپ، وتكەن جىلدىڭ سايكەس كەزەڭىمەن سالىستىرعاندا 1,6 ميلليون تونناعا ارتىق بولدى»، - دەگەن قاراعاندى وبلىسىنىڭ اكىمى ۇزىن- سونار كەزەكتە تۇرعانداردىڭ 50 پايىزىن كورشى وبلىستارىنىڭ تۇرعىندارى قۇرايتىندىعىن ايتتى.

وسىدان كەيىن باقىتجان ساعىنتايەۆ وعان كومىر ماسەلەسىن قاتاڭ باقىلاۋدا ۇستاۋدى تاپسىردى.