قىرعىزستانداعى پرەزيدەنتتىك سايلاۋدا كىم جەڭىسكە جەتەدى
بىشكەك. قازاقپارات - قىرعىزستانداعى پرەزيدەنتتىك سايلاۋعا دەيىن 5 كۇن قالدى. سايلاۋ الدىنداعى ۇگىت- ناسيحات كەزەڭى اياسىندا كانديداتتار سايلاۋشىلارمەن كەزدەسۋ ماقساتىندا جانە وزدەرىنىڭ باعدارلامالارىن ءتۇسىندىرۋ تۇرعىسىندا ەلدىڭ بارشا وڭىرلەرىن ارالاپ كەلدى.
وسى ورايدا «قازاقپارات» ءتىلشىسى تانىمال ساياساتتانۋشى مارس ساريەۆپەن كەزدەسىپ، سايلاۋ ناۋقانىنا بايلانىستى ونىڭ پىكىرىن ءبىلدى.
«باستاپقىدا رەيتينگتە كانديدات ومىربەك بابانوۆ ەلەۋلى تۇردە باسىمىراق بولدى. ول قوماقتى قارجىلىق رەسۋرستى پايدالانا وتىرىپ، سايلاۋ الدىنداعى ناۋقاندى بەلسەندى تۇردە باستاپ كەتتى»، - دەپ ويىمەن ءبولىستى ساياساتتانۋشى. «كەيىننەن سوورونباي جەيەنبەكوۆ جاعدايدى تۇزەتۋگە قاۋقارلى بولدى، سوندىقتان قازىرگى كەزدە ولار تەڭبە تەڭ كەلە جاتىر دەپ پايىمدايمىن. ءبىزدىڭ ەلدىڭ ەرەكشەلىگىن ەسكەرسەك، كۇن سايىن قانداي دا ءبىر وزگەرىستەر بولۋى مۇمكىن. وسى ورايدا كانديداتتاردىڭ رەيتينگى دە قۇبىلىپ تۇرادى».
- سوڭعى ۋاقىتتا ءارتۇرلى دەرەكتەرمەن كوپتەگەن رەيتينگتەر پايدا بولدى. بۇل رەتتە سولاردىڭ قايسىسىنا سەنۋگە بولادى؟
- وسى ماسەلەدە بەدەلدى تاۋەلسىز رەيتينگ اگەنتتىكتەرىنىڭ كورسەتكىشتەرىنە سەنەر ەدىم. الايدا ولار بۇگىندە ءبىزدىڭ ەلدە رەيتينگ جاساماي ءجۇر. ال قالعان كورسەتكىشتەر قانداي مالىمەتتەرگە سۇيەنىپ وتىرىپ جاسالعانىن ايتۋ قيىن. كوبىنەسە رەيتينگكە كىمدەر تاپسىرىس بەرسە، سولار كوش باستايتىنى بەلگىلى. سوندىقتان دا بۇنداي رەيتينگتەر ولاردىڭ وبەكتيۆتىلىگىنە كۇمانمەن قاراۋعا يتەرمەلەيدى.
- جالپى، قازىرگى سايلاۋ الدىنداعى دوداعا قانداي باعا بەرەر ەدىڭىز؟
- وتكەن تەلەسايىسقا قاراپ وتىرساق، ءبىزدىڭ العا جىلجىپ كەلە جاتقانىمىزدى بايقاۋعا بولادى. بۇل تۇرعىدا ءاربىر جاڭا سايلاۋ سايىن دەموكراتيالىق نەگىز ارتا تۇسەدى دەپ سەنەمىن. ەڭ باستىسى، قازىرگى كەزدە الداعى 6 جىلعا قانداي پرەزيدەنتى قالايتىندىعىن تەك حالىق قانا شەشۋى ءتيىس. داۋىس بەرۋگە بىرنەشە كۇن قالعاننىڭ وزىندە دە، جەڭىسكە ۇمىتكەرلەردىڭ اراسىندا بىرەۋىنە كەپىلدى تۇردە جەڭەدى دەپ باسىمدىق بەرۋ مۇمكىن ەمەس.
اۆتور: رۋسلان عابباسوۆ
