تالدىقورعاندا سۋرەتشىلەردىڭ حالىقارالىق پلەنەرى باستالدى
بيىل ق ر ش. ءۋاليحانوۆ اتىنداعى مەملەكەتتىك سىيلىعىنىڭ لاۋرەاتى، «قۇرمەت بەلگىسى»، «ەڭبەك قىزىل تۋ» وردەندەرىنىڭ يەگەرى، ەسىمى رەسپۋبليكانىڭ قۇرمەتتى التىن كىتابىنا جازىلعان، قازاقستان ونەرىن دامىتۋعا قوسقانى ۇلەسى ءۇشىن «تارلان» سىيلىعىن العان ايشا عالىمبايەۆانىڭ تۋعانىنا - 100 جىل. «تۋعان جەرىم - تۇعىرىم» حالىقارالىق كاسىپقوي سۋرەتشىلەردىڭ پلەنەرى وسى مەرەيتوي قارساڭىندا «رۋحاني جاڭعىرۋ» باعدارلاماسى اياسىندا ۇيىمداستىرىلىپ وتىر.
شارانىڭ نەگىزگى بولىگى تەكەلى قالاسىندا وتەدى. سۋرەتشىلەر 10 كۇن بويى جەتىسۋ جەرىنىڭ اسەم تابيعاتىندا شىعارماشىلىقتارىن شىڭدايدى. ءوزارا تاجىريبە الماسىپ، كۇزدىڭ اسەم بوياۋلارىن بەينەلەيتىن بولادى. پلەنەرگە قىرعىزستان مەن قىتايدان جانە استانا، الماتى، پاۆلودار قالالارى مەن باتىس قازاقستان وبلىسىنان سۋرەتشىلەر كەلگەن. الماتى وبلىسىنىڭ قىلقالام شەبەرلەرى دە شارادان شەت قالماق ەمەس.
پلەنەردىڭ جابىلۋ سالتاناتى 18 - قازان، ساعات 11:00-دە تالدىقورعان قالاسىنداعى «وقۋشىلار سارايىندا» وتەدى. قىلقالام شەبەرلەرى وسى كۇندەر ارالىعىندا سالعان سۋرەتتەرىن الماتى وبلىسى «كوركەمونەر گالەرەياسىنىڭ» قورىنا تابىستايدى. جەتىسۋدىڭ اسەم تابيعاتىن ون كۇنگە جۋىق بەينەلەگەن قىلقالام شەبەرلەرىنىڭ جۇمىس بارىسىنان بەينەروليكتەر جاسالىپ، تۋىندىلارىنان ۇيىمداستىرىلعان كورمە دە كوپشىلىك نازارىنا ءدال وسى كۇنى ۇسىنىلاتىن بولادى.
اۆتور: سامال قابىشيەۆا
