ەنەرگەتيكا ءمينيسترى: مەنىڭ تاعدىرىم پرەزيدەنتتىڭ قولىندا

استانا. قازاقپارات - بۇگىن ۇكىمەت وتىرىسىندا ق ر پرەمەر- مينيسترى باقىتجان ساعىنتايەۆ ەلدەگى بەنزين تاپشىلىعىنا بايلانىستى لاۋازىمدى تۇلعالارعا قاتىستى قاتاڭ شارا قولدانعان.

جيىندا ەنەرگەتيكا ءمينيسترى قانات بوزىمبايەۆقا سوگىس، ال ونىڭ ورىنباسارى اسەت ماعاۋوۆ قىزمەتىنەن بوساتۋعا قاتىستى شەشىم قابىلداندى. ۇكىمەت وتىرىسىنان كەيىن قانات بوزىمبايەۆ ۇكىمەت باسشىسىنىڭ شەشىمىن تالقىعا سالا المايتىنىن ايتتى، دەپ حابارلايدى Baq.kz.

«ءسىز پرەمەر- مينيسترگە بەنزين تاپشىلىعىنا بايلانىستى ماسەلەنى دۇرىس تۇسىندىرە الدىڭىز با؟ ءسىز بەنزينگە تاپشىلىق جوق ەكەنىن ايتتىڭىز. پرەمەر- مينيستر بەنزين وسۋىنە اسەر ەتكەن فاكتورلاردى سىلتاۋ دەدى. ياعني ءسىزدىڭ ايتقىڭىز كەلگەندى ۇكىمەت باسشىسى ءتۇسىندى مە؟ ءسىز وزىڭىزگە قارسى قولدانىلعان اكىمشىلىك شارانى ورىندى دەپ ويلايسىز با؟ پرەمەر- ءمينيستردىڭ قابىلداعان شەشىمدەرى جايلى نە ايتاسىز؟ » ، - دەدى جۋرناليستەر.

«پرەمەر- مينيستر مەنىڭ تىكەلەي باسشىم. سوندىقتان ونىڭ شەشىمىن تالقىلاۋعا مەنىڭ حاقىم جوق. بىرىنشىدەن، وزىمنەن جوعارى تۇرعان ورگاننىڭ شەشىمىن تالقىعا سالا المايمىن. سەبەبى، مەن ۇكىمەت مۇشەسىمىن. ال ول (ق ر پرەمەر- ءمينيسترى - اۆتور) ۇكىمەتتىڭ باسشىسى. سوندىقتان مەن ونىڭ ارەكەتىن تالقىعا سالمايمىن. مەملەكەتتىك قىزمەتكەر ەتيكاسىنا قارسى كەلە المايمىن. ەكىنشىدەن، ول ءوز قۇزىرەتى نەگىزىندە ءتيىستى شەشىم قابىلدادى. ونى دا مەن تالقىعا سالا المايمىن. ءوزىمنىڭ تاراپىمنان، مەن اتالعان ماسەلەگە قاتىستى پرەزەنتاتسيا وتكىزدىم. بەنزين تاپشىلىعى ماسەلەسىن شەشۋ ءۇشىن قانداي جۇمىستار اتقارىلۋ قاجەتتىگىن ايتتىم» ، - دەدى ەنەرگەتيكا ءمينيسترى.

سونىمەن قاتار قانات بوزىمبايەۆ ەلدەگى بەنزين تاپشىلىعى اپتا سوڭىندا شەشىلەتىنىن اتاپ ءوتتى.

«وسى اپتانىڭ سوڭىندا بەنزين تاپشىلىعىنا بايلانىستى ماسەلە تۇراقتالادى. بەنزين باعاسى تومەن بولادى دەپ سىزدەرگە كەپىلدىك بەرە المايمىن. ءبىراق قاراشا ايلارىندا نارىقتاعى قازاقستان بەنزينىنىڭ ۇلەسى جوعارى پايىزعا يە بولادى» ، - دەدى مينيستر.

سونىمەن قاتار ب ا ق وكىلدەرى باسشىعا كەزەكتى ساۋالىن جولدادى.

«ءسىز الداعى ۋاقىتتا كورشى مەملەكەتتەگى جانار- جاعارماي باعاسى بىردەي بولۋ ءۇشىن بەنزين باعاسى وسەدى دەپ ايتتىڭىز. سونىمەن قاتار بۇرىننان شەشىلمەگەن ماسەلەلەر بار. وتستاۆكاعا كەتۋ جوسپارىڭىزدا بار ما؟ » ، - دەدى ولار.

«مەن وسى ۇكىمەتتىڭ ءمينيسترىمىن. مەنىڭ تاعدىرىم پرەزيدەنتتىڭ قولىندا. پرەزيدەنت نە ايتسا، مەن سولاي ىستەيمىن. ماسەلە بولسا، ءبىز ونى دۇرىس جولعا ءتۇسىرۋىمىز قاجەت» ، - دەپ جاۋاپ بەردى قانات بوزىمبايەۆ جۋرناليستەردىڭ سۇراعىنا.