لاتىن قارپىندەگى قازاق ءالىپبيىن مەڭگەرۋ جاستارعا ەش قيىندىق تۋعىزبايدى - دانيار سۇندەتبايەۆ
«نۇر وتان» پارتياسى «جاس وتان» جاستار قاناتىنىڭ ءتوراعاسى دانيار سۇندەتبايەۆ وسىلاي دەپ پىكىرىن ءبىلدىردى، دەپ حابارلايدى «قازاقپارات» ح ا ا ءتىلشىسى.
«جاستار ءاۋ باستان لاتىن قارپىنە كوشۋ تۋرالى باستامانى ءبىر اۋىزدان قولداپ كەلەدى. ونى لاتىن قارپىنە قاتىستى ەلباسىنىڭ سوڭعى سوزىنەن دە اڭعارۋعا بولادى. ويتكەنى، مەنىڭشە، لاتىن ءالىپبيى قازىرگى جاس بۋىنعا ءبىرشاما جاقىن سەكىلدى. ءبىز جاستارمەن ءوزارا سمس- حابارلامالاردى الماسقاندا ءدال وسى لاتىن ارىپتەرىن قولدانامىز. ءالىپبيدىڭ سوڭعى نۇسقاسى جاستاردىڭ كوڭىلىنەن شىققانىن سەنىممەن ايتا الامىن. ويتكەنى، ءالىپبيدىڭ ءبىرىنشى نۇسقاسى بويىنشا ءبىرقاتار الا- قۇلا پىكىرلەر بولعانىن دا بىلەسىزدەر»، - دەيدى «جاس وتان» جاستار قاناتىنىڭ ءتوراعاسى.
سونىمەن بىرگە، دانيار سۇندەتبايەۆ پرەزيدەنتكە تانىستىرىلعان جاڭا جوبانى بىردەن ۇناتقانىن ايتادى.
«ەڭ باستىسى، جاڭا نۇسقادا قازاقتىڭ ءتول ارىپتەرىنىڭ بەلگىلەنگەنىن ەرەكشە اتاپ وتۋگە بولادى. مىسالى، نازاربايەۆ ۋنيۆەرسيتەتىندە جۇمىس اتقاراتىن تۇركيادان كەلگەن ءبىر عالىم ءاۋ باستا تۇرىك تىلىندە «ءا» جانە «ق» ارىپتەرى بولعانىن ايتىپ، الايدا لاتىن الىپبيىنە كوشكەن كەزدە سول ارىپتەر جوعالىپ كەتكەنىن ايتقان بولاتىن. ياعني، «ءا» ءارپى «ا» - عا اينالىپ، «ق» ءارپى «ك» - گە وزگەرىپ، ول جاقتاعى قاۋىم ءتول ارىپتەرىنەن ايىرىلىپ قالعان. سوندىقتان، ءبىزدىڭ جاعدايدا جاڭا الىپبيدەگى ءتول ارىپتەرىمىزدىڭ ساقتالۋىنىڭ ماڭىزى زور بىلەمىن»، - دەيدى دانيار سۇندەتبايەۆ.
سونىمەن بىرگە، دانيار سۇندەتبايەۆ جاستار تەلەفون پايدا بولعالى بەرى، س م س-(كەلتەحات) حابارلامالاردى، الەۋمەتتىك جەلىدەگى اقپاراتتاردى لاتىن قارپىمەن الماسىپ جۇرگەندىكتەن، جاڭا ءالىپبيدى مەڭگەرۋ جاس بۋىنعا اسا قيىندىق تۋعىزبايتىنىن ايتادى.
ەسكە سالا كەتسەك، 9 -قازان كۇنى ەلباسىنا لاتىن قارپىندەگى ءالىپبيدىڭ جاڭا جوباسى تانىستىرىلعان بولاتىن. قازاقستان پرەزيدەنتى لاتىن قارپىنە كوشۋگە بايلانىستى جاستاردىڭ بۇل ۇدەرىستى قولداعانىنا ريزاشىلىعىن بىلدىرگەن بولاتىن.
