قازاقستان رەسەيدەن بەنزين ەكسپورتىن ارتتىرماق
ونىڭ اتاپ وتۋىنشە، مۇنداي قادام بەنزين تاپشىلىعىنا جول بەرمەۋ ءۇشىن جاسالۋدا. «باعالاۋىمىزشا قىركۇيەك ايىندا يمپورت كولەمى شامامەن 90 مىڭ تونناعا ۇلعايدى. ياعني، ءىس جۇزىندە ەكى ەسەگە كوبەيدى. ەگەردە وعان دەيىن يمپورت ۇلەسى 15 پايىز بولسا، قىركۇيەكتە شامامەن 30 پايىزعا جەتتى. دەگەنمەن، بارلىق كومپانيالار بىردەي يمپورتپەن اينالىسا العان جوق. سەبەبى بىزدە بولشەك باعانى رەتتەۋ تۇرعىسىندا زاڭناما بارىنشا قاتاڭ. ياعني، بولشەك باعانىڭ ءبىر مەزەتتە كەز كەلگەن كوتەرىلۋى باعاعا ىمىرالاسۋ رەتىندە باعالانادى. وسىعان بايلانىستى كومپانيالاردىڭ ءبىر بولىگى يمپورتتىق جەتكىزىلىم جاسامادى. سوعان بايلانىستى قىركۇيەك ايىندا اتالعان 90 مىڭ توننا يمپورت بولعاننىڭ وزىندە قىركۇيەك ايىندا قالعان قالدىق ونىڭ الدىنداعى ايمەن سالىستىرعاندا تومەندەدى»، - دەدى اسەت ماعاۋوۆ.
ونىڭ سوزىنە قاراعاندا، جانار- جاعارماي نارىعىنداعى ورىن الىپ وتىرعان جايتقا بايلانىستى ەنەرگەتيكا مينيسترلىگى وتاندىق كومپانيالاردىڭ باسشىلارىمەن يمپورتتى كۇشەيتۋ ماقساتىندا كەڭەس وتكىزگەن.
«شامامەن 20 مىڭ توننانى گازپرومنەفت يمپورتتاۋى ءتيىس. قازمۇنايگاز 10 مىڭ تونناعا كەلىسىمشارت جاساستى، 20 مىڭ تونناعا ارنالعان قوسىمشا كەلىسىمشارت قول قويۋ كەزەڭىندە تۇر. مەنىڭشە، بۇگىن- ەرتەڭ وعان قول قويىلادى. بۇعان قوسا، گەليوس، سينويل كومپانيالارى ۋفا توبىنا كىرەتىن زاۋىتتاردان 20 مىڭ توننا جەتكىزۋ جايىن تالقىلاۋدا»، - دەدى ۆيە- مينيستر.
بۇل ماسەلەنى مينيسترلىك رەسەيلىك ارىپتەستەرىمەن بايلانىسقا شىعىپ، ۇنەمى باقىلاۋدا ۇستاۋدا. «بۇگىن روسنەفت ۆيتسە- پرەزيدەتىمەن جەتكىزىلىمدى جەتەدەلدەتۋ ماسەلەسى بويىنشا سويلەستىك. ولاردىڭ تارابىنان قولداۋدى كورىپ وتىرمىز. قازاقستانعا كەمىندە شامامەن 100 مىڭ توننا يمپورتتالادى دەپ جوسپارلاۋدامىز. ءبىزدىڭ سولتۇستىك وبلىستارىمىزعا جەكە تارتىپپەن يمپورتتىڭ كەلىپ جاتقانىن ەسكەرەر بولسا، وندا 100 مىڭ توننادان ارتىق بولادى دەپ ويلايمىز»، - دەدى ول.
ەستەرىڭىزگە سالا كەتسەك، وتكەن ايدان بەرى ەلىمىزدە اي-92 ماركالى بەنزين تاپشى بولۋدا.
اۆتور: مارلان جيەمباي
