ەۋرازيا ۇلتتىق ۋنيۆەرسيتەتىن دامىتۋ باعدارلاماسى ۇكىمەتكە ۇسىنىلادى

استانا. قازاقپارات - ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىن ءارى قاراي دامىتۋ باعدارلاماسى قازاقستان رەسپۋبليكاسى ۇكىمەتىنىڭ نازارىنا ۇسىنىلادى. بۇل تۋرالى بۇگىن حالىق الدىنداعى ەسەپتىك كەزدەسۋىن وتكىزگەن اتالعان ۋنيۆەرسيتەتتىڭ رەكتورى ەرلان سىدىقوۆ ايتتى، دەپ حابارلايدى قازاقپارات.

ونىڭ ايتۋىنشا، ەۋرازيا ۇلتتىق ۋنيۆەرسيتەتىنىڭ ستراتەگياسىندا ۇلتتىق زەرتتەۋ ۋنيۆەرسيتەتى مارتەبەسىن الۋعا ۇمتىلاتىندىعى ايتىلعان.

 «زەرتتەۋ ۋنيۆەرسيتەتى - ءبىز ءۇشىن دە، سىزدەر ءۇشىن دە زور مۇمكىندىك. ەندى «وقىتۋ - زەرتتەۋلەر جۇرگىزۋ - زەرتتەۋ ناتيجەلەرىن ەنگىزۋ - يننوۆاتسيالىق كاسىپورىندار قۇرۋ» تىزبەگىنەن تۇراتىن سيكل جۇزەگە اسۋى ءتيىس. بۇل ناقتى قولداۋدى، تەرەڭ تۇسىنىستىكتى قاجەت ەتەدى. جاڭا پاتەنتتىك- ليسەنزيالىق ساياساتتى جاساۋ - تەحنولوگيالاردى كوممەرتسيالىق ماقساتتا پايدالانۋ كەزىندەگى قارىم- قاتىناستى رەتتەۋدىڭ قۇرالى. ۇلتتىق زەرتتەۋ ۋنيۆەرسيتەتى مارتەبەسى كاسىبي كادرلارعا تالاپتى كۇشەيتەدى. زياتكەرلىك عىلىم- ءبىلىم سالاسىندا شەتەلدىك پروفەسسۋرانىڭ قاتىسۋى ارقىلى جاڭا كادر ساياساتىن جۇزەگە اسىرۋ ەلدىڭ يننوۆاتسيالىق دامۋ فاكتورىن نىعايتادى»، - دەدى ول.

وسى رەتتە ۋنيۆەرسيتەت باسشىسى ءبىلىم ورداسى اياسىندا ماركەتينگ ءبولىمى، HR - ساياسات، الىستان ءبىلىم بەرۋ ورتالىعى، ادىستەمەلىك كابينەت، كاسىبي بەيىمدەۋ جانە تەستىلەۋ ورتالىعى جانە باسقا دا قۇرىلىمدار بولاتىندىعىن جانە ولار باسقارۋ جانە ۇيىمدىق قۇرىلىمدى ىقشامداۋعا مۇمكىندىك بەرەتىندىگىن باسا ايتتى. «كولبەۋ باسقارۋ بايلانىسى جەتىلدىرەدى. بۇل رەتتە اركىمنىڭ جەكە جاۋاپكەرشىلىگى كاسىبي بىلىكتىلىكتىڭ ولشەمىنە اينالادى. «رۋحاني جاڭعىرۋ» باعدارلاماسىنىڭ يدەولوگيالىق ءارى پراكتيكالىق بولىكتەرى - ۋنيۆەرسيتەتتىڭ ءبىلىم بەرۋ ساياساتىنداعى شەشۋشى باعدار. عىلىم، يننوۆاتسيا، ءبىلىم جانە الەۋمەتتىك سالالارداعى جوسپارلاردى دامىعان ينفراقۇرىلىممەن عانا جۇزەگە اسىرا الامىز. ستۋدەنتتەردىڭ الەۋمەتتىك جاعدايىن جاساۋ، ولاردىڭ وقۋى مەن تۇرمىسىنا جايلى جاعداي تۋعىزۋ - ماڭىزدى مىندەتىمىز. وسىعان دەيىن دە جۇرگىزىلىپ كەلگەن «ستۋدەنتتەر ۇيلەرىن»، جاڭا وقۋ عيماراتتارىن سالۋ، پايدالانۋعا بەرۋ، ينفراقۇرىلىمدى دامىتۋ جۇمىستارىمىزدى ودان ءارى جالعاستىرامىز»، - دەدى ول.

 سونىمەن قاتار ەرلان سىدىقوۆ ۇلتتىق بيوتەحنولوگيا ورتالىعىن، ەكسپو- نىڭ قوسالقى ينفراقۇرىلىمدىق نىساندارىن ۋنيۆەرسيتەت بالانسىنا الۋ بويىنشا جۇمىستار جۇرگىزۋ، عىلىمي كىتاپحانانى جاڭا باسىمدىقتار نەگىزىندە جاڭعىرتۋ، اقپاراتتىق- كوممۋنيكاتيۆتىك تەحنولوگيالاردى ەنگىزۋ ۋنيۆەرسيتەتتىڭ ءبىرىنشى كەزەكتەگى مىندەتتەرى بولاتىندىعىن باسا ايتتى.

 «ەۋرازيا ۇلتتىق ۋنيۆەرسيتەتىن ءارى قاراي دامىتۋ باعدارلاماسى قازاقستان رەسپۋبليكاسى ۇكىمەتىنىڭ نازارىنا ۇسىنۋ ءۇشىن ازىرلەندى»، - دەدى ەرلان سىدىقوۆ.

 اۆتور: مارلان جيەمباي