سىدىقوۆ استاناداعى ەۋرازيا ۇلتتىق ۋنيۆەرسيتەتىنىڭ دامۋ ستراتەگياسىن جاريا ەتتى

استانا. قازاقپارات - بۇگىن حالىق الدىنداعى ەسەپتىك كەزدەسۋىن وتكىزگەن ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ەلىمىزدەگى باستى ءبىلىم ورتالارىنىڭ ءبىرىنىڭ الدىندا تۇرعان نەگىزگى مىندەتتەردى اتادى، دەپ حابارلايدى قازاقپارات.

«ءبىز ءوز ستراتەگيامىزدا ۇلتتىق زەرتتەۋ ۋنيۆەرسيتەتى مارتەبەسىن الۋعا ۇمتىلاتىنىمىزدى جاريالادىق. بۇگىنگى كۇنى دامۋدىڭ جاڭا كەزەڭىنە قادام باساتىنىمىزدى رەسمي تۇردە مالىمدەگىم كەلەدى. بۇل نەنى بىلدىرەدى؟ ەلباسىنىڭ 2001 -جىلى 5 - شىلدەدەگى جارلىعىنا سايكەس، ەۋرازيا ۇلتتىق ۋنيۆەرسيتەتى ءوز ايرىقشا مارتەبەسى بويىنشا ءبىلىم بەرۋ قىزمەتىنىڭ مازمۇنىن دەربەس انىقتاي الاتىن. قازىر تالاپ تا، تالعام دا وزگەردى. ءبىز مۇنى جاقسى بىلەمىز! كاسىبي بىلىكتىلىك ماقساتى مەن جۇمىس بەرۋشىلەردىڭ مۇددەسى - ءارقاشان ءبىزدىڭ ويىمىزدا. «ورتالىق ازيادا ءبىلىم بەرۋ حابىن دامىتۋ جانە عىلىمدى جاڭعىرتۋ» باعدارلاماسى اعىلشىن ءتىلدى باعدارلامالاردى كۇشەيتتى. سونىڭ ناتيجەسىندە شەتەلدىك پروفەسسورلار مەن ستۋدەنتتەردىڭ قىزىعۋشىلىعى ارتتى»، - دەدى ەرلان سىدىقوۆ.

وسى رەتتە ول ە ۇ ۋ- دىڭ ۇلتتىق زەرتتەۋ ۋنيۆەرسيتەتىنە كوشۋدەگى پەرسپەكتيۆالارعا توقتالدى. ونىڭ ايتۋىنشا، قوس ديپلومدى باعدارلامالاردى حالىقارالىق دەڭگەيگە كوتەرۋ شەتەلدىك ستۋدەنتتەردى تارتۋعا يگى ىقپالىن تيگىزەدى. ماگيستراتۋرا مەن دوكتورانتۋرادا وقيتىنداردىڭ قاتارى كوبەيەدى. بۇل - زەرتتەۋ ۋنيۆەرسيتەتىنىڭ ماڭىزدى سيپاتتارىنىڭ ءبىرى.

«الدا نەگىزگى ماماندىقتار بويىنشا كادرلاردىڭ بىلىكتىلىگىن ارتتىرۋ مەن قايتا دايارلاۋدىڭ كوپ ساتىلى باعدارلامالارىن جۇزەگە اسىرۋ مىندەتى تۇر. سونىمەن قاتار، زەرتتەۋ ۋنيۆەرسيتەتى ءبىرىنشى كەزەڭدە جاڭا ءبىلىم الەۋەتىن قالىپتاستىرىپ، ۇلتتىق ەكونوميكاعا تەحنولوگيالار ەنگىزۋى ءتيىس. ىرگەلى جانە قولدانبالى زەرتتەۋلەردىڭ باسىم باعىتتارى ايقىندالدى. ولار مەملەكەتتىك قارجىلاندىرۋدىڭ ەسەبىنەن دە، مەكەمەلەر مەن بيزنەس قۇرىلىمدارىنىڭ تاراپىنان دا قولداۋ تابادى»، - دەدى ۋنيۆەرسيتەت باسشىسى.