مينيستر مەملەكەتتىك قىزمەتشىلەردىڭ تۇنگە دەيىن جۇمىس ىستەۋىنە قاتىستى پىكىر ءبىلدىردى

استانا. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مەملەكەتتىك قىزمەتشىلەردىڭ تۇنگە دەيىن جۇمىس ىستەۋىنە قاتىستى پىكىر ءبىلدىردى.

ماجىلىستە وتكەن ۇكىمەت ساعاتىندا دەپۋتات يرينا سميرنوۆا مينيستر تامارا دۇيسەنوۆادان بيۋدجەتتىك مەكەمە قىزمەتكەرلەرىنىڭ تۇنگە دەيىن جۇمىس ىستەۋىنە قاتىستى نە ويلايتىنىن سۇرادى، دەپ حابارلايدى Sputnik قازاقستان.

«سوڭعى ۋاقىتتا بيۋدجەتتىك ۇيىمداردا تاڭعى سەگىزدەن تۇنگە دەيىن جۇمىس ىستەۋ تاجىريبەسى قالىپتاسىپ وتىر. رەسمي تۇردە جۇمىس كۇنىنىڭ ساعات 18.00-دە اياقتالاتىنىنىڭ ەش ءمانى جوق. ءارى جۇمىس ۋاقىتىنان تىس ەڭبەك ءۇشىن قوسىمشا اقى قاراستىرىلماعان. وسىلايشا، جۇمىستى دۇرىس ۇيىمداستىرا الماعان جەتەكشى ءوزىنىڭ وكىلەتتىگىن اسىرا وتىرىپ، شەنەۋنىكتەر مەن قىزمەتكەرلەردى جۇمىستا ۇستاپ قانا قويماي، باسشى ولاردىڭ اتا- انا ەكەنىن ۇمىتادى. جۇمىستى وسىلاي ۇيىمداستىرۋعا ءسىزدىڭ كوزقاراسىڭىز قانداي؟ قاراماعىنداعىلاردىڭ قۇقىعىن بۇزاتىن باسشىنىڭ جاۋاپكەرشىلىگى قانداي؟»، - دەپ سۇرادى مينيستردەن دەپۋتات.

«ەڭبەك كودەكسىنە سايكەس جۇمىس ۋاقىتى اپتا ىشىندە 40 ساعات، كۇنىنە 8 ساعات بولىپ بەكىتىلگەن. ەگەر ۇستەمە جۇمىس بولسا، تاۋلىگىنە 2 ساعات، ايىنا 12 جانە جىلىنا 120 ساعاتتان اسپاۋى ءتيىس. بۇل رەتتە ۇستەمە جۇمىسقا قىزمەتكەردىڭ جازباشا تۇردەگى كەلىسىمى بويىنشا عانا تارتۋعا بولادى»، - دەپ جاۋاپ بەردى دۇيسەنوۆا.