بويجەتكەن ءوزى تۇسىرگەن سۋرەتتىڭ ارقاسىندا ءبىر تۇندە جارتى الەمگە تانىلدى

استانا. قازاقپارات - بۇل وقيعا يسلانديانىڭ استاناسى رەيكياۆيكەدە بولعان. مايكل دجون كەنت ەشكىم جوق جەردە ءوزىنىڭ سۇيىكتىسىنە ۇسىنىس جاساماق بولادى.

بۇل تۋرالى best-fan.ru باسىلىمى جازدى.

وسى رومانتيكالىق كورىنىستى كۇتپەگەن جەردەن بەيتانىس بويجەتكەن سۋرەتكە ءتۇسىرىپ الادى. ول سۋرەتتى مايكلگە جىبەرۋگە ۋادە بەرىپ، ونىڭ ەلەكتروندى پوشتاسىنىڭ مەكەن-جايىن جازىپ الادى. وكىنىشكە وراي، مايكل ءوزىنىڭ پوشتاسىن قاتە جازادى. ءۇمىتىن ۇزبەگەن جىگىت ەرتەسى كۇنى Facebook جەلىسىندە كەلەسى حاتتى جاريالايدى.

«قىمباتتى دوستارىم! كەشە فيوناما ۇسىنىس جاسادىم. وسى ءساتتى بەيتانىس ءبىر قىز سۋرەتكە ءتۇسىرىپ العان ەدى. ءبىراق، مەن تولقىپ تۇرىپ وعان پوشتامنىڭ مەكەن-جايىن قاتە جازىپ جىبەرىپپىن. ارينە، ول بەيتانىس بويجەتكەندى تابۋ قيىنعا سوعادى. ءبىراق، ومىردە تاڭعاجايىپتار ءجيى بولىپ جاتادى عوي. مەن ۇسىنىس جاساعان جەردىڭ سۋرەتىن وسى جەرگە جۇكتەدىم. ەگەر الگى سۋرەت تابىلىپ جاتسا، مەن باقىتتى بولاتىن ەدىم»، - دەپ جازادى ول جەلىدەگى پاراقشاسىنا.

وسى جازبادان كەيىن مايكلگە مىڭداعان ادام كومەكتەسكىلەرى كەلەتىندەرىن جازىپ، جازبانى ارى قاراي ءبولىسىپ وتىرعان. الگى بەيتانىس قىز كاسىبي فوتوگراف بولىپ شىقتى. ول دا الگى سۋرەتتى جەلىگە جۇكتەپ، جازبا قالدىرعان ەكەن.

«بۇل ءبىر تاماشا كەش بولدى. مەن دوستارىمىزبەن بىرگە وتىرعان باردان شىققان بولاتىنمىن. قار جاۋىپ تۇرعان ءساتتى پايدالانىپ، بىرنەشە سۋرەت ءتۇسىرۋدى ءجون كوردىم. الىستا تۇرعان جۇپتى بايقاپ قالىپ، ولاردى دا سۋرەتكە ءتۇسىرىپ الدىم. جىگىت تىزەرلەپ تۇرىپ سۇيىكتىسىنە ۇسىنىس جاساعان بولاتىن. سالدەن كەيىن ولارعا جاقىنداپ، سۋرەتتى جىبەرۋ ءۇشىن ەلەكتروندى پوشتالارىن جازىپ الدىم. ول قاتتى تولقىپ تۇرعان ەدى. كەيىن قوشتاستىق. ولار ماعان شابىت سىيلادى. «ءدال قاجەت جەردە، قاجەت ۋاقىتتا تابىلۋ» دەگەن وسى شىعار»، - دەپ جازادى بويجەتكەن.

مايكل بويجەتكەنمەن حابارلاسىپ، ودان بىردەن سۋرەتتى سۇراپ العان. ەرتەسىندە قوس عاشىق الگى سۋرەتشىمەن جولىعىپ، وعان بەتپە- بەت العىستارىن ايتقان. بۇل وقيعا - ومىردە تاڭعاجايىپتىڭ بار ەكەنىنە تاعى ءبىر دالەل.