اڭىزعا اينالعان بالۋان شولاق جايىندا فيلم ءتۇسىرىلدى - فوتو
قازىرگى ۋاقىتتا رەجيسسەر نۇرگەلدى سادىعۇلوۆتىڭ كوركەم فيلمدەگى العاشقى تۋىندىسىنىڭ مونتاجداۋ كەزەڭى ءجۇرىپ جاتىر. اتالعان تاريحي شىعارما ءانشى جانە كومپوزيتور، اتى اڭىزعا اينالعان بالۋان شولاق ومىرىنەن سىر شەرتەدى.
«قازىر مونتاجدى بىتىرگەلى وتىرمىز. مونتاج - فيلمنىڭ ءۇشىنشى جانە سوڭعى كەزەڭى. مونتاجعا كوپ ۋاقىتىم كەتتى، سەبەبى تۇسىرىلگەن ماتەريال اۋقىمدى ءارى قىزىقتى. مونتاجدىڭ سوڭعى نۇسقاسىن «قازاق فيلمنىڭ» ەكسپەرتتىك كەڭەسىنە كورسەتەمىز. سودان كەيىن عانا دىبىستاۋ جۇمىستارى، گرافيكا جانە تۇستەۋ جاسايمىز»، - دەدى نۇرگەلدى سادىعۇلوۆ.
سونداي-اق، رەجيسسەر بۋرابايدا وتكەن تۇسىرىلىمدەر تۋرالى دا ءسوز ەتتى.
«كوكشەتاۋداعى تۇسىرىلىمدەر وتە ءساتتى ءوتتى دەپ ويلايمىن، سەبەبى مەن ءۇشىن تابيعات تاپتىرماس اكتەر. ءتۇسىرىلىم كەزىندە جاڭبىر جاۋىپ، بوران بولدى. سوعان قاراماستان ءتۇسىرىلىم توپ تا، اكتەرلەر دە ءبىر ادامداي جۇمىس ىستەدى. سونىڭ ارقاسىندا الدىمىزعا قويعان ماقساتىمىزعا قول جەتكىزدىك. مونتاجداپ بولعان سوڭ، ەپيلوگ كەرەك دەگەن شەشىم قابىلدادىم. فيلمنىڭ ەپيلوگىن تۇسىرسەك فيلم اسەرلى ءارى تاقىرىپ كەڭىنەن اشىلادى دەپ سەنەم»، - دەدى ول.
ش. ايمانوۆ اتىنداعى « قازاق فيلم» كينوستۋدياسى باسپا ءسوز قىزمەتىنىڭ مالىمەتىنشە، فيلمنىڭ تۇسىرىلىمدەرى الماتى وبلىسى، پاۆلودار قالاسى جانە بۋرابايدا وتكەن. الماتى وبلىسى كەگەن جانە جالاڭاش اۋىلدارىندا فيلمنىڭ نەگىزگى بولىگى تۇسىرىلگەن. كوپشىلىك ساحنالارعا ءۇش جۇزگە جۋىق ادام قاتىسقان.
«ەڭ باستىسى مەن ءۇشىن بالۋان شولاقتىڭ بەينەسىن ۇلكەن ەكرانعا اكەلۋ جانە سول ءداۋىردى كورسەتۋ. قانشالىقتى ءساتتى نەمەسە ءساتسىز شىقانىن ەكران كورسەتەدى. تۇسىرىلگەن ماتەريال ءجۇز پايىزعا ۇنايدى دەپ ايتا المايمىن. كەيدە مونتاجدان اشۋمەن كەتەمىن، كەيدە قۋانىشپەن شىعام. اكتەرلەردىڭ بارلىعى دا بارىن سالدى. دەسە دە، بالۋان شولاقتىڭ رولىندەگى ەركەبۇلان دايىروۆ، اقىلبايدى سومداعان مەدعات ومىراليەۆ پەن دولگونوسوۆتى ويناعان الەكساندر باگريانسيەۆتى ەرەكشە اتاپ وتكىم كەلەدى»، - دەدى فيلم رەجيسسەرى.
ايتا كەتەيىك، فيلمگە ەكى بىردەي ترەيلەر جانە ەكى ساۋندترەك ازىرلەنىپ جاتىر. شىعارماشىلىق توپ ولاردى جاقىن ارادا كورەرمەن نازارىنا ۇسىنادى. فيلم جىلدىڭ سوڭىندا كورەرمەن نازارىنا جول تارتادى دەپ جوسپارلانۋدا.
