اقتوبەدەگى مۋزىكالىق كوللەدج ديماشتىڭ فاناتتارىنا قۇرمەت كورسەتتى - فوتو
ديماش قۇدايبەرگەن مۋزىكالىق كوللەدجدە ءبىلىم الىپ ءجۇرىپ، العاشقى بايقاۋلاردى جەڭىسكە جەتكەن سوڭ فاناتتارى كەلىپ، ول ءبىلىم العان وقۋ ورنىمەن تانىسۋدى ادەتكە اينالدىرعان. بۇل جولى اقتوبەگە لوس اندجەلەستەن پاتريسيا گرۋلليون كەلدى. ول ديماش قۇدايبەرگەننىڭ ورىنداۋىنداعى اندەرگە ءتانتى بولىپ، ورال قالاسىندا وتكەن كەشكە ارنايى قاتىستى. كەزدەستى، ىقىلاسىن ءبىلدىردى. كەيىن ونىڭ تۋعان جەرى مەن ءبىلىم العان ورداسىنا كەلىپ، ۇستازدارىمەن تانىسۋعا شەشىم قابىلداعان.
«ديماش قۇدايبەرگەننىڭ فاناتتارىمەن تانىسىپ، ولارعا ۇلتتىق سالت- ءداستۇرىمىزدى تانىستىردىق، ءداستۇرلى اندەر شىرقالىپ، قىزدار ءبي بيلەدى. شۇباتتان ءدام تاتتى. كەيىن كوللەدجدە ءبىلىم الىپ جۇرگەن وزگە تالانتتى بالالاردىڭ ونەرىن تاماشالاپ، وزدەرىنىڭ تاڭدانىسىن جاسىرا المادى. ەشكىمگە ۇقسامايتىن ەرەكشەلىگىمىزدى، قوناقجايلىلىعىمىزدى كوردى. ولار بىزدەن بايلانىستى بولادى. بۇرىن اقش ەلشىلىگىمەن تىعىز قارىم-قاتىناستا ەدىك. ءبىراق سوڭعى جىلدارى بايلانىس ءۇزىلىپ قالدى. ەندى ۇزىلگەن بايلانىستى قايتا جالعايمىز. ولار بىزگە، ءبىز ولارعا كونسەرتتىك باعدارلامامەن بارۋىمىز مۇمكىن»، - دەدى احمەت جۇبانوۆ اتىنداعى مۋزىكالىق كوللەدج ديرەكتورى امانجول يسماعۇلوۆ.
اقتوبەگە كەلگەن پاتريسيا گرۋلليون احمەت جۇبانوۆ اتىنداعى مۋزىكالىق كوللەدجدىڭ مۇراجايىن تاماشالاپ، ءوز قولتاڭباسىن قالدىردى. كەزدەسۋدە كوللەدج وقىتۋشىلارى مەن ارداگەرلەر، وقۋ ورنىنىڭ تۇڭعىش ديرەكتورى قايىرعالي قوجانبايەۆ بولدى.
«شەتەلدەن، قازاقستاننىڭ وزگە وڭىرلەرىنەن فاناتتار كەلىپ جاتىر. پاتريسيا گرۋلليون ارنايى كەلگەن سوڭ ۇستازى مارات ايتىموۆپەن كەزدەستى. بىرنەشە ستۋدەنتتىڭ ورىنداۋىندا جاقسى اندەر تىڭدادى. ءبىزدىڭ تۇلەگىمىز سۆەتلانا كاسياندى دا تانيدى ەكەن. ول قازىر رەسەيدە تۇرادى، وپەرا ءانشىسى بولىپ جۇمىس ىستەيدى»، - دەدى امانجول يسماعۇلوۆ.
ال ديماش قۇدايبەرگەننىڭ فاناتى پاتريسيا گرۋلليون ءانشىنىڭ ۇستازى مارات ايتىموۆكە العىس ايتتى.
«ديماش قۇدايبەرگەننىڭ ۇستازى مارات ايتىموۆپەن تانىسۋ باقىتى بۇيىردى. ۇستازى مىقتى، ديماشتىڭ جولى بولعان. ول بىزگە ۋاقىت ءبولىپ، جاناشىرلىق تانىتتى»، - دەدى پاتريسيا گرۋلليون.
