الماتى وبلىسىندا قىزىلاعاش سۋ قويماسى قالپىنا كەلتىرىلۋدە

تالدىقورعان. قازاقپارات - الماتى وبلىسىنداعى  قىزىلاعاش سۋ قويماسىن قالپىنا كەلتىرۋ جۇمىستارى قارقىن الدى، دەپ حابارلايدى قازاقپارات ءتىلشىسى.

 وعان رەسپۋبليكالىق بيۋدجەتتەن 5,9 ميلليارد تەڭگە قارجى بولىنگەن. بيىل جىل سوڭىنا دەيىن مەردىگەرلەر 1 ميلليارد 802 ميلليون تەڭگەنى يگەرۋ كەرەك. قازىرگى تاڭدا ەسكى سۋ قويمانىڭ ورنى تازارتىلىپ، ەلەكتر جەلىلەرى تارتىلىپ، 12 شاقىرىم جول توسەلدى. جوندەۋ جۇمىستارىنا 120 ادام مەن 70-تەن استام ءارتۇرلى تەحنيكا جۇمىلدىرىلعان.

مەردىگەر مەكەمەنىڭ باس ينجەنەرى راحىم رازبايەۆتىڭ ايتۋىنشا، جاڭا بوگەت الدىڭعىسىنان الدە قايدا بەرىك جانە ساپالى بولماق. توسپانىڭ جالپى ۇزىندىعى 310 مەتر، بيىكتىگى 55,5 مەتر. ال سۋ قويماعا 42,2 ميلليون تەكشە مەتر سۋ سيادى. ستراتەگيالىق ماڭىزدى نىسان قايتا ىسكە قوسىلسا ەلدىڭ ءال- اۋقاتى ارتادى دەيدى ماماندار.

 «قانت قىزىلشاسىن وسىرەتىن القاپتار قالپىنا كەلەدى. جاڭا جۇمىس ورىندارى اشىلىپ، ءوڭىردىڭ ەكونوميكاسىنا قان جۇگىرەدى. بۇعان ەڭ الدىمەن شارۋالار قاتتى قۋانىپ وتىر. سەبەبى بۇرىنعى سۋ قويما تەك  1420 گەكتار القاپتى سۋارسا، جاڭا توسپامەن  6700- 7000 گەكتار القاپتى يگەرۋگە مۇمكىندىك بار»، دەيدى «قازسۋشارۋاشىلىعى» ر م ك الماتى وبلىستىق فيليالىنىڭ ديرەكتورى سەيىلحان مۇحاماديەۆ.

كاسىپورىن باسشىسى جاڭا سۋ قويمادا جۇمىس ىستەيتىن مامانداردىڭ دا جاعدايى قاراستىرىلعانىن ايتىپ وتىر. بوگەتتىڭ باسىندا جانە تومەنگى جاعىنداعى سۋ تاراتۋ تورابىندا 4 پاتەرلى ەكى ءۇي سالىنىپ جاتىر. جالپى بوگەتتىڭ قۇرىلىسىن 2018 -جىلدىڭ جەلتوقسان ايىندا اياقتاۋ كوزدەلگەن.

 ەستەرىڭىزگە سالا كەتەيىك، 2010 -جىلى 12- ناۋرىزدا  قىزىلاعاش سۋ قويماسىنىڭ ارناسى تولىپ، بوگەت شىداس بەرمەي بۇكىل ءبىر اۋىلدى قىزىل سۋ شايىپ كەتكەن بولاتىن.

 اۆتور: سامال قابىشيەۆا