كوكشەتاۋدا قازاق تازىسى مەن اسىل تۇقىمدى توبەتتەردىڭ كورمە- بايقاۋى وتكىزىلدى - فوتو

كوكشەتاۋ. قازاقپارات - كوكشەتاۋدا قازاق تازىسى مەن اسىل تۇقىمدى توبەتتەردىڭ ءبىرىنشى رەسپۋبليكالىق كورمە- بايقاۋى وتكىزىلدى، دەپ حابارلايدى قازاقپارات ءتىلشىسى.

 شارانى «رۋحاني جاڭعىرۋ» باعدارلاماسىن جۇزەگە اسىرۋ شەڭبەرىندە «قانسونار» اڭشىلاردىڭ قوعامدىق بىرلەستىگى مەن اڭشىلىق شارۋاشىلىعى سۋبەكتىلەرىنىڭ رەسپۋبليكالىق قاۋىمداستىعى، اقمولا وبلىسىنىڭ اكىمدىگى جانە اۋىل شارۋاشىلىعى مينيسترلىگى بىرلەسىپ، ۇيىمداستىرىپ وتىر. جەتى قازىنانىڭ ءبىرى سانالاتىن اسىل تۇقىمدى توبەت ءتورت تۇلىك مالدى ءتۇز تاعىلارىنان قورعاسا، قۇماي تازىنى قازاق حالقى ەجەلدەن اڭشىلىققا پايدالانعان.

 بۇگىندە كونەنىڭ كوزىندەي بولعان سول اسىل تۇقىمدىلار جويىلماي، ساقتالىپ كەلە جاتقان جايى بار. ءدۇبىرلى دوداعا رەسپۋبليكانىڭ تۇكپىر- تۇكپىرىنەن 100-دەن اسا تازى، توبەت، سپانيەل، باتىس- ءسىبىر لايكاسى، دراتحاار، ياگدتەرەر سياقتى يتتەر اكەلىندى. جارىس تالابى بويىنشا يتتەر بىرنەشە سىناقتان وتكىزىلىپ، ەڭ ۇزدىكتەرىنىڭ يەلەرى ارنايى ديپلوم، كۋبوك جانە باعالى سىيلىقتارمەن ماراپاتتالدى.

ەسكە سالا كەتەيىك، اقمولا وبلىسىندا 70 جۋىق ادام اسىل تۇقىمدى ءيت اسىراۋمەن اينالىسادى.

اۆتور: اسلان وسپانوۆ