اتىراۋدا كوزدەرى كورمەسە دە ءبىر- بىرىنە عاشىق جۇپ تۇرادى
دەپ جازادى اق جايىق.
ابىلاي سپورتتا دا، ونەردە دە ءبىراز جەتىستىككە جەتىپ ۇلگەرگەن. بالالىق شاعىن اۋىل ساحناسىندا ءان ايتۋمەن وتكىزگەن ول بۇگىندە رەسپۋبليكالىق ءان بايقاۋلارىنىڭ دا ديپلومانتى اتانىپ ۇلگەرگەن.
ابىلاي بولاشاق جارى فاريزامەن ول WhatsApp مەسسەندجەرى ارقىلى تانىسىپ، جارتى جىلداي سويلەسىپ جۇرگەن. وندا كوزى كورمەيتىندەردىڭ توبى بار. سەزىمدەرىنىڭ ودان ءارى ءورشي تۇسۋىنە الماتى قالاسىنداعى شيپاجايداعى ەكەۋىنىڭ دەمالىسى سەبەپشى بولدى.
«دەمالىپ اتىراۋعا كەلگەننەن كەيىن اكە- شەشەمە وسى قىزعا ۇيلەنەتىنىمدى ايتتىم. وزىمنەن بۇرىن اتا- انام ۋايىمدادى. «ءوزىڭ دە ءبىرىنشى توپ مۇگەدەگىسىڭ، ەرتەڭگى كۇنى قالاي بولار ەكەن. بۇل قادام - ۇلكەن جاۋاپكەرشىلىك» ، - دەدى.
اقىرىندا اتا- انامدى كوندىرىپ، سودان ۇلكەندەردىڭ باتاسىن الىپ، الماتىعا اتتاندىم. فاريزانىڭ اتا- اناسىنىڭ رۇقساتىمەن ونى اتىراۋعا الىپ كەلدىم. اتا- انام فاريزانى كوردى، ۇناتىپ تا ۇلگەردى، قولىنان ءشاي ءىشتى. قازىر تويعا قىزۋ دايىندىق ۇستىندە»، - دەيدى ابىلاي.
ال فاريزانىڭ اتا- انالارى اتىراۋلىق جىگىتكە تۇرمىسقا شىعۋىنا بىردەن كەلىسە قويماعان.
فاريزا 14 جاسقا دەيىن كورىپ كەلىپ، كەيىن مۇلدە قاراڭعىلىق باسىپ كەتكەن. وتباسىنداعى باسقا بالالاردا دا كوزدىڭ كورۋىنەن پروبلەما بار. سوندىقتان ول اكەسى جاعىنان تۇقىم قۋالاۋشىلىق بار دەپ ويلايدى. سەبەبى اناسىنىڭ كوزى كورەدى. فاريزاعا كادىمگى مەكتەپتى تاستاپ، زاعيپتار جانە كوزدەرى ناشار كورەتىن بالالارعا ارنالعان مەكتەپ- ينتەرناتقا وقۋعا تۇسۋىنە تۋرا كەلدى. ونى ءتامامداپ شىققان سوڭ سپورت جانە تۋريزم اكادەمياسىنا ماسساجيست ماماندىعىنا تاپسىردى. قازىر اكادەميانىڭ ەكىنشى كۋرسىندا ءبىلىم الۋدا.
« بۇرىن تۇرمىس قۇرامىن با دەپ ۋايىمدايتىنمىن. ابىلاي سياقتى جىگىتتى كەزدەستىرىپ، ءوز باقىتىمدى تاپقانىما قۋانىشتىمىن. كوڭىلىنەن شىعۋعا تىرىسىپ ءجۇرمىن. تەك ازىرگە اتىراۋدىڭ كوشەلەرىمەن ءوز بەتىممەن سەرۋەندەپ جۇرە المايمىن. الماتىدا ارنايى تاياعىممەن قوعامدىق كولىكپەن وقۋىما بارىپ كەلىپ، ساياباقتارعا ءجيى شىعىپ تۇراتىنمىن. ول جاقتا جاياۋ جۇرگىنشىلەر جولدارى جۇرۋگە ىڭعايلى، سويلەيتىن باعدارشامدار دا بار»، - دەيدى فاريزا.
جاستار ابىلاي قولىنا ديپلومىن العان سوڭ اۋىلعا كوشىپ بارۋدى جوسپارلاپ وتىر. ويتكەنى ول شاڭىراقتاعى جالعىز ۇل. ابىلاي سپورت پەن ونەردى دە قاتار الىپ جۇرگىسى كەلەدى. ەكەۋى دە ەرتەڭ قولعابىس بولاتىن كوپ بالالارىمىز بولسا دەپ ارماندايدى. . .
