قوستانايلىق بالۋان قازاق كۇرەسىنەن الەم چەمپيونى اتاندى
- ەرلان، جەڭىس قۇتتى بولسىن! « قازاقستان بارىسى» مەن « ەكسپو-2017» كورمەسىندەگى جارىستان سوڭ كوپ ۇزاماي الەم چەمپيوناتىنا اتتاندىڭىز. قيىنعا سوققان شىعار؟
- ارينە، الەم چەمپيوناتىنا « سەن تۇر، مەن اتايىنداردىڭ» بارلىعى كەلەدى. ەلىمىزدە وتكەن اۋقىمدى جارىستاردان كەيىن بايراقتى باسەكەگە قاتىسۋ كەز كەلگەنىمىز ءۇشىن وڭايعا تيمەگەنى انىق. ءتىپتى، ءبىرىنشى بەلدەسۋدە- اق تىزەمدى شىعارىپ الدىم. دەگەنمەن، بۇل - سپورت. ەل نامىسىن ارقالاپ كەلگەن سوڭ اۋەلگى مىندەت ابىرويمەن كۇرەسۋ بولدى. قالاۋىن تاپساڭ، كەز كەلگەن قيىندىقتان وتۋگە بولادى. ايتپەسە، بىردە رەسپۋبليكالىق تۋرنيردە جەڭىپ كەلە جاتىپ، بەلدەسۋدىڭ اياقتالۋىنا 20 سەكۋند قانا ۋاقىت قالعاندا، ۇتىلىپ قالعانىم بار. . . ۇلكەن زالدا قانشاما مىڭ ادام ساعان كوز تىگىپ وتىرادى. ايعاي- قيقۋ، مۋزىكا، جارىقتىڭ ءبارى ساعان اسەر ەتەدى. سول كەزدە ەڭ الدىمەن پسيحولوگيالىق ىشكى تۇيسىك دايىندىعى اسا قاجەت. ەگەر ءوز- ءوزىڭدى سول جەردە قايراي بىلسەڭ، ءسوز جوق، جەڭىسكە جەتتىڭ!
- بۇل دودادا قاي ەلدەردىڭ بالۋاندارى بولدى؟
- العاشقى اينالىمداردا پولشا مەن قىتاي سپورتشىلارىن ۇتتىم. سودان سوڭ تاجىريبەلى ازىربايجاندىقپەن شىقتىم. بۇل جولى دا باعىم جاندى. جارتىلاي فينالدا لاتۆيالىق بالۋاندى جەڭدىم. ال، فينالدا اتاقتى رەسەيلىك، دزيۋدودان حالىقارالىق دارەجەدەگى سپورت شەبەرى الەكساندر روسلاكوۆ كۇتىپ تۇردى. جاراقاتىم قاراماستان، بەلدەسۋدى ابىرويمەن اياقتادىم.
- ءسويتىپ، بىلەكتىلەر باسەكەسىنەن وزىق شىقتىڭىز. جالپى، الەم چەمپيوناتىن كىم ۇيىمداستىردى؟
- ەرلەر اراسىندا 7- رەت، ايەلدەر اراسىندا تۇڭعىش رەت وتكىزىلدى. دۇنيەجۇزىلىك قازاق كۇرەسى فەدەراتسياسى جانە بىرىككەن كۇرەس وداعى ۇيىمداستىردى. بارلىعى وتىزعا جۋىق ەلدەن بالۋاندار قاتىستى. بۇل قازاقتىڭ ءتول سپورت ونەرىنىڭ دامىعانىن كورسەتەدى. بيىلعى الەم چەمپيوناتى داڭقتى سپورتشى، بەلارۋس قازاق كۇرەسى فەدەراتسياسىنىڭ قۇرمەتتى پرەزيدەنتى الەكساندر مەدۆەدتىڭ قۇرمەتىنە وراي ۇيىمداستىرىلدى. سونداي- اق، تۇڭعىش رەت نازىكجاندىلار اراسىندا الەم چەمپيوندارى انىقتالدى.
- اڭگىمەڭىزگە راحمەت!
