شىعىس قازاقستان وبلىسىندا مۇحتار اۋەزوۆتىڭ ەسكەرتكىشى بوي كوتەردى

استانا. قازاقپارات - شىعىس قازاقستان وبلىسىنىڭ جارما اۋدانىنا قاراستى اۋەزوۆ كەنتىندە زاڭعار جازۋشى مۇحتار اۋەزوۆتىڭ ەسكەرتكىشىنىڭ اشىلۋ سالتاناتى ءوتتى، دەپ حابارلايدى « قازاقپارات» ح ا ا ءتىلشىسى.

 جارما اۋدانىڭ « قالبا تىنىسى» گازەتى باس رەداكتورىنىڭ ورىنباسارى مەيىرحان وسپانبايەۆ حابارلاعانداي، ەسكەرتكىشتىڭ اشىلۋىنا ءبىرقاتار قوعام قايراتەرلەرى، سونىڭ ىشىندە مۇحتار اۋەزوۆتىڭ ۇلى مۇرات اۋەزوۆ تا كەلگەن. زاڭعار جازۋشىنىڭ 120  جىلدىعى وتكەن ايدا اباي اۋدانىندا اتالىپ وتكەن. ءبىرتۋار تۇلعانى جارما اۋدانى دا ۇمىت قالدىرماپتى.

اۋدان اكىمى نۇرلان سىدىقوۆتىڭ ايتۋىنشا، زاڭعار جازۋشى كوزى ءتىرى كەزىندە جارما وڭىرىندە بولىپ، اقجال دەگەن كەنىشكە بارىپ، وچەرك جازعان ەكەن.

« ەسكەرتكىشتىڭ بوي كوتەرۋىنە دەمەۋشىلىك جاساعان كاسىپكەر ورازحان قاليەۆكە زور العىسىمىزدى بىلدىرەمىز. اۋەزوۆتىڭ رۋحاني مۇرالارى ۇرپاققا دەمەۋ بولىپ، ىزگىلىككە شاقىرىپ كەلەدى. ۋاقىت وتكەن سايىن جازۋشىنىڭ ەڭبەكتەرىنىڭ ماڭىزى ارتا تۇسپەك. ويتكەنى ونىڭ تۋىندىلارى ادامزات دۇنيەسىنە ءتان ماڭگىلىك قۇندىلىقتاردى پاش ەتەدى. اۋەزوۆتەي عۇلامانىڭ شىعارمالارىنان ءنار العان ۇرپاقتىڭ ساناسى سەرگەك، ويى وزىق، رۋحى مىقتى بولماق. بۇگىنگى ءىس- شارا دا وسى ماقساتتى كوزدەيدى»، - دەيدى نۇرلان سىدىقوۆ.

اۋدان اكىمى ەسكەرتكىشتىڭ اشىلۋىنا كەلگەن جازۋشىنىڭ ۇلى مۇرات مۇحتار ۇلىنا، عاريفوللا ەسىم تاعى ءبىرقاتار قوعام قايراتكەرلەرىنە ات مىنگىزىپ، شاپان جاپتى.

« بۇگىن بۇل وڭىردە، شىنىمەن، ەرەكشە ماعىنالى وقيعا بولىپ وتىر. اۋەزوۆ كەنتىندە ەڭسەلى ەسكەرتكىش ءوز ورىنىن تاۋىپ وتىر. رۋحتانىپ وتىرمىز. جاقىندا عانا مۇحتار اۋەزوۆتىڭ لوندوندا جيناقتارى شىقتى. تاۋەلسىزدىگىمىز بەن ەلدىگىمىزگە، مۇحتار اۋەزوۆتىڭ ۇلەسى زور دەپ بىلەمىن»، - دەيدى مۇرات اۋەزوۆ.

فوتوسۋرەت: مەيىرحان وسپانبايەۆ

اۆتور: ايان بەكەن ۇلى