سەمەيدە حالىقارالىق ءداستۇرلى انشىلەر بايقاۋى وتەدى
بۇل تۋرالى فەيسبۋك پاراقشاسىندا سەمەيلىك اقىن مەرەي قارتوۆ حابارلادى.
«امىرە قاشاۋبايەۆ اتىنداعى مەملەكەتتىك فيلارمونياسىنىڭ ۇيىمداستىرۋىمەن قازاقستاننىڭ ەڭبەك سىڭىرگەن مادەنيەت قىزمەتكەرى، مۇقاعالي ماقاتايەۆ اتىنداعى سىيلىقتىڭ يەگەرى، ءانشى، كومپوزيتور تۇرسىنعازى راحيموۆ اتىنداعى «ءسابي بولعىم كەلەدى» حالىقارالىق ءداستۇرلى انشىلەر بايقاۋى وتەدى. اشىلۋ سالتاناتى قازان ايىنىڭ 10- جۇلدىزىندا قالالىق مادەنيەت سارايىندا ساعات 14.00-15.00 ارالىعىندا ۇيىمداستىرىلىپ، 1 - كەزەڭى ساعات 15.00-دەن 19.00-گە دەيىن جالعاسادى. كەلەسى كۇنى اباي اتىنداعى مۋزىكالىق دراما تەاترىندا بايقاۋدىڭ 2- كەزەڭى ساعات 10.00-13.00 ارالىعىندا ۇيىمداستىرىلىپ، ساعات 16.00-دە شارانىڭ سالتاناتتى جابىلۋى گالا- كونسەرتپەن اياقتالماق»، - دەپ جازادى مەرەي قارتوۆ.
بايقاۋدىڭ ماقساتى - تۇرسىنعازى راحيموۆتىڭ شىعارماشىلىق جولىنا كەڭ تالداۋ جاساپ، ەڭبەگىن ۇرپاقتان- ۇرپاققا جەتكىزۋ، تالانتتى جاستاردىڭ شەبەرلىگىن شىڭداۋعا ىقپال ەتۋ. حالىقارالىق دەڭگەيدە وتكەلى وتىرعان اۋقىمدى شاراعا بايقاۋ قوناقتارى رەتىندە رامازان ستامعازيەۆ، تولعانباي سەمبايەۆ، ەرلان رىسقالي، الماسبەك الماتوۆ، ءادىل تۇرعانبايەۆ، مەدەت سالىقوۆ، كلارا تولەنبايەۆا، عالىم مۇحامەدين، ەربول ايتبايەۆ، جولامان قۇجىمانوۆ، ەركىن شۇكىمان، مانشۇك تۇرسىنعازينا، اسەم وماروۆا سىندى انشىلەر شاقىرىلعان.
ايتا كەتسەك، ءانشى، كومپوزيتور، قازاقستاننىڭ ەڭبەك سىڭىرگەن مادەنيەت قىزمەتكەرى تۇرسىنعازى راحيموۆ وتكەن جىلى 65 جاسقا قاراعان شاعىندا دۇنيە سالعان بولاتىن. ول 1951 -جىل اياگوز اۋدانىندا دۇنيەگە كەلگەن. 1994 -جىلى «ءسابي بولعىم كەلەدى» اتتى اندەر جيناعى شىققان. مۇقاعالي ماقاتايەۆتىڭ «داريعا، دومبىرامدى بەرشى ماعان»، «وتىزدان اسىپ بارامىن»، «مەن سەنى ساعىنعاندا»، «ساناۋلى كۇن، ساناۋلى اي، ساناۋلى جىل»، «ءسابي بولعىم كەلەدى» اتتى تانىمال ولەڭدەرىنە اۋەنگە اينالدىرعان كومپوزيتوردىڭ جۇزگە تارتا ءانى قالدى.
اۆتور: ايان بەكەن ۇلى
