ا ق ش بيلىگى لاس- ۆەگاستاعى قىرعىندى تەرگەۋگە جۇرتتان كومەك سۇرادى
ايماق شەريفىنىڭ ورىنباسارى كيەۆين ماكمەحيلدىڭ ايتۋىنشا، قىلمىستان كەيىن بەس كۇن وتسە دە، بەلسەندى جۇرگىزىلىپ جاتقان تەرگەۋگە قاراماستان، وتكەن جەكسەنبىنىڭ كەشىندە مۋزىكا فەستيۆالىن تاماشالاۋعا كەلگەن جۇرتقا وق اتۋعا كۇدىكتىنى نە يتەرمەلەگەنى تەرگەۋشىلەرگە ءالى جۇمباق بولىپ وتىر.
تەرگەۋشىلەر سان ءتۇرلى بولجامدى قاراستىرىپ كورگەنىمەن قىلمىستىڭ سەبەبىن انىقتاۋ ىسىندە تىعىرىققا تىرەلگەن. كۇدىكتىنىڭ جەكە ءومىرى، ساياسي كوزقاراسى، وزگە ادامدارمەن قارىم- قاتىناسى، اقشاعا قاتىستى ىستەرى، ءتۇرلى راديكالدىق توپتارمەن ىقتيمال بايلانىسى - وسىنىڭ بارىنە تەرگەۋشىلەر نازار اۋدارىپ، تەكسەرگەن. ونىڭ كومپيۋتەرىن، تەلەفوندارىن، ينتەرنەتتەگى بەلسەندىلىگىن زەرتتەگەن. ارنايى قىزمەت وكىلدەرىنىڭ ايتۋىنشا، جاپپاي ادام ولتىرگەن وزگە قىلمىسكەرلەرمەن سالىستىرعاندا كۇدىكتى ەشقانداي مالىمدەمە، مانيفەست قالدىرماعان، باسپا ءسوز قۇرالدارىمەن نەمەسە پوليتسيامەن بايلانىسۋعا ارەكەت جاساماعان، الەۋمەتتىك جەلىلەردى دە پايدالانباعان.
پوليتسيا كۇدىكتىنىڭ اتىس كەزىندە Mandalay Bay قوناقۇيىنىڭ 32-قاباتىنداعى بولمەدە جالعىز بولعانىنا سەنىمدى. ءبىراق، قىلمىس جاسالماس بۇرىن وعان الدەكىم كومەكتەسكەن بولۋى دا ىقتيمال، سەبەبى بولمە ىشىنە سونشاما كوپ - 20-دان اسا قارۋ- جاراق اپارۋ جالعىز ادامعا وتە اۋىر بولارى انىق. كۇدىكتىنىڭ مەنشىگىندەگى ەكى ءۇيى مەن ءقوناقۇيدىڭ جەر استىنداعى قاباتىنا قويعان كولىگىنەن ونداعان جارتىلاي اۆتوماتتى ۆينتوۆكا، وق- ءدارى جانە جارلىعىش زاتتار تابىلعان.
بيلىك ورىندارى لاس- ۆەگاستاعى بيللبوردتارعا قالا تۇرعىندارىنا قاراتا ايتىلعان: «ەگەر بىردەڭە بىلسەڭىز - ايتىڭىز» دەگەن ۇندەۋدى ءىلىپ قويماق.
