وتاندىق «شىڭىراۋ» فيلمىنىڭ ءتۇسىرىلىمى اياقتالدى
شاكەن ايمانوۆ اتىنداعى «قازاق فيلم» كينوستۋدياسى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن بۇل فيلم قازىر مونتاجداۋ كەزەڭىندە تۇر.
- كومەديا جانە ەكشن جانرىنداعى فيلمدەردىڭ سۇرانىسقا يە ەكەنىنە قاراماستان، ءابىش كەكىلبايەۆتىڭ كلاسسيكاعا اينالعان «شىڭىراۋ» شىعارماسىن ۇلكەن ەكراننان كورەرمەن نازارىنا ۇسىنۋدى ءجون دەپ تاپتىق. بۇل ءپالساپالىق كارتينادا كورىنىس تاپقان كوركەم دەكوراتسيالار، كوستيۋمدەر جانە كوز تويارلىق ادەمى تابيعات اياسىنداعى رومانتيكاعا تولى ساحنالار، كاسپيي تەڭىزى، سىرعا تولى ماڭعىستاۋ ءوڭىرى كورەرمەندى بەي- جاي قالدىرمايدى دەپ ويلايمىن. مەنىڭشە، ءبىزدىڭ فيلم ءوز ۇلتىنىڭ تاريحىنان حاباردار، كلاسسيكالىق ادەبي شىعارمالاردى ۇناتاتىن، تەرەڭ ويلاناتىن اعا بۋىن مەن جاس بۋىن كورەرمەنگە ارنالعان فيلم. سونداي- اق، بيزنەسمەندەرمەن قاتار، قاراپايىم ەڭبەك ادامدارىنا دا ءبىراز وي تاستايتىن فيلم. جانە دە فيلمدى كورگەن ادام وسى وڭىرگە جاڭاشا كوزقاراسپەن قاراپ، وسى ايماقتىڭ تابيعاتىن ساقتاپ قالۋدىڭ جولدارىن قاراستىرۋعا ىقپال ەتەدى، - دەدى فيلمنىڭ رەجيسسەرى جانىبەك جەتىرۋوۆ.
رەجيسسەردىڭ ايتۋى بويىنش، فيلمنىڭ مونتاجداۋ كەزەڭىندە كوپتەگەن جۇمىس اتقارىلعان. ولار - دۋبلدەردى تاڭداۋ، ساحنالار مەن ەپيزودتاردىڭ قاتارىن ناقتىلاۋ، ساحنانىڭ جانە جالپى ءفيلمنىڭ ءريتمىن انىقتاۋ. فيلمدى دىبىستاپ، ساحنا بويىنشا قاجەتتى مۋزىكا جازىلعان. كەيىپكەرلەردى دىبىستاۋ ءۇشىن داۋىستار تاڭدالىپ، كاستينگ جۇرگىزىلگەن. اتالمىش كاستينگكە جۇزدەن استام اكتەر قاتىسقان ەكەن.
- كارتينادا ءبىرقاتار دراماتۋرگيالىق قاقتىعىستار بار. ول كوزقاراستار مەن سەنىمدەر قاقتىعىسى، وتباسىلىق قاقتىعىس، ادامنىڭ وزىمەن قاقتىعىسى، دۇنيەتانىم قاقتىعىسى، قۇدىق قازۋشىلاردىڭ اراسىنداعى قاقتىعىس، ءوزارا تۇسىنىسپەۋشىلىك. فيلمدەگى پىكىرلەستەر، دوستار، وداقتاستاردىڭ ءوزارا كەلىسپەۋشىلىگىنىڭ سوڭى ۇلكەن تەككەتىرەسكە ۇلاسادى جانە تەرەڭ ويلاماۋدىڭ، سونداي- اق، ورىن العان جاعدايدى قابىلداماۋدىڭ كەسىرىنەن كوپتەگەن قيىندىقتارعا تاپ بولادى.. فيلمنىڭ شيەلەنىسى اكە مەن بالا اراسىنداعى، وي مەن جۇرەك، ماحاببات پەن وشپەندىلىك، جاڭا مەن ەسكىنىڭ قاقتىعىسى. فيلمنىڭ باس كەيىپكەرلەرى - اۋىر ەڭبەكتەن قاجىعان قۇدىق قازۋشى ەڭسەپ، كەرەڭ بولسا دا جانى ىزگىلىكتى قالايتىن، ادامي قاسيەتتەرگە باي وسپان جانە جاس قوس عاشىق اقمونشاق پەن اسىلحان، - دەپ رەجيسسەر، فيلمنىڭ باس كەيىپكەرلەرىن سومداعان الدابەك شالبايەۆ، اسىلحان تولەپوۆ جانە جاس اكتريسا ايجان جەتىرۋ تۋرالى ايتىپ بەردى.
قازىرگى تاڭدا فيلمنىڭ كومپيۋتەرلىك گرافيكاسىمەن قاتار، مۋزىكالىق ارلەۋ جۇمىستارى ءجۇرىپ جاتىر. فيلمنىڭ مۋزىكاسىن كومپوزيتور ارمان جايىم جازعان. رەجيسسەردىڭ ايتۋى بويىنشا، كارتينادا كوپ كلاسسيكالىق مۋزىكا جانە كومپوزيتورلاردىڭ تانىمال شىعارمالارىنىڭ وڭدەلگەن نۇسقالارى بار.
فيلمنىڭ قىسقاشا مازمۇنى: فيلم جيىرماسىنشى عاسىردىڭ باسىنداعى قازاق قوعامىندا قالىپتاسقان الەۋمەتتىك پروبلەمالاردى قوزعايدى. جارتىلاي وتىرىقشى جانە كوشپەلى تۇرمىس كەشەتىن قازاقتاردىڭ اراسىن جالعاستىرىپ جۇرگەن باستى كەيىپكەر ەڭسەپ شىڭىراۋدان قۇدىق قازىپ، ۇستىرتتە اتى شىعادى. ەڭسەپ باي اۋقاتتى ادامداردىڭ قۇدىعىن قازىپ، كەدەي كەپشىكتەردىڭ تاپسىرىستارىنا اتۇستى قارايدى. وسى تاكاپپارلىعى وزىنە كەسىر بولىپ، ول اقىرى جۇمىسسىز قالادى. اۋىلعا بۇحارا جاقتان كوشىپ كەلگەن قالپاق دەگەن بىرەۋ، ەڭسەپتىڭ ورنىن باسىپ، ۇستىرتتە ەڭ تەرەڭ قۇدىق قازادى. بۇل ەڭسەپتىڭ قىزعانىشىن وياتادى. ول ودان دا تەرەڭ قۇدىق قازام دەپ، اقىرى باسەكە تۇبىنە جەتەدى.
«ايقىن» گازەتى
