ورالدا «جاقسى ءسوز - جاننىڭ تىنىسى» اتتى بايقاۋ مارەگە جەتتى

 ورال. قازاقپارات - ع. قۇرمانعاليەۆ اتىنداعى وبلىستىق فيلارمونيا زالىندا مەكەمەلەر مەن كاسىپورىندار اراسىندا «جاقسى ءسوز - جاننىڭ تىنىسى» اتتى وبلىستىق ءسوز سايىسى بايقاۋى مارەگە جەتتى، دەپ حابارلايدى «قازاقپارات» ءتىلشىسى.

مەملەكەتتىك ءتىلدىڭ قولدانىلۋ اياسىن كەڭەيتۋ، قوعامنىڭ ءار سالاسىندا قىزمەت ەتىپ جۇرگەن ءتىلدى جەتىك بىلەتىن، قابىلەتتى مامانداردى ىنتالاندىرۋ، رۋحاني قۇندىلىقتاردى ناسيحاتتاۋ ماقساتىندا ب ق و تىلدەردى دامىتۋ باسقارماسى ۇيىمداستىرعان سايىسقا بارلىعى سەگىز توپ قاتىسىپ، باق سىنادى. باسقارما باسشىسى ايگۇل مىڭبايەۆانىڭ ايتۋىنشا، بايقاۋ ءتورت باعىت بويىنشا توپتىق تۇردە ءوتتى.

«مەنىڭ وتانىم - قازاقستان» اتتى ءبىرىنشى بولىمدە ءار ۇمىتكەر توپ ءوزىن جانە مەكەمەسىن تانىستىرىپ، ءتىل ءبىلۋ شەبەرلىگىن كورسەتتى. «مەملەكەتتىك ءتىلدى ءبىلۋ - پارىزىم» تاقىرىبىندا قاتىسۋشىلار ەسسە جازىپ، وندا قازاقستانداعى قازىرگى ساياسي- الەۋمەتتىك ماسەلەلەر، «رۋحاني جاڭعىرۋ» باعدارلاماسى قامتىلدى.

 «ونەرلىگە ءورىس كەڭ» بولىمىندە ءار توپ ءوز ونەرلەرىن ء(ان، كۇي، بي، كوركەم ءسوز وقۋ) ورتاعا سالدى. ال «جۇيرىكتەن جۇيرىك وزار جارىسقاندا» بولىمىندە توپتار ءبىر- بىرىمەن پىكىر الماسىپ، سۇراقتارعا جاۋاپ بەردى.

«بولاشاققا باعدار: رۋحاني جاڭعىرۋ» ، «ەكسپو-2017» - قازاقستاننىڭ ەكونوميكالىق دامۋ الەۋەتىن جاھانعا تانىتار جوبا» ، «الاش ۇكىمەتىنە 100 -جىل» - تاۋەلسىزدىكتىڭ رۋحاني باستاۋى» سەكىلدى تاقىرىپتار توڭىرەگىندە وي تولعادى. بايقاۋ قورىتىندىسىندا وبلىستىق ىشكى ىستەر دەپارتامەنتىنىڭ «پاراساتتى پوليتسەي» كومانداسى باس جۇلدەنى جەڭىپ الدى. وبلىستىق كلينيكالىق اۋرۋحانانىڭ «جان داۋاسى» ءبىرىنشى، «قازاقتەلەكوم» ا ق- نىڭ «Qazaqtili.com» توبى ەكىنشى، ب ق و دەنساۋلىق ساقتاۋ باسقارماسىنىڭ «دەنساۋلىعى» ءۇشىنشى ورىنعا يە بولدى.