مەملەكەتتىك سىيلىق بەرىلەتىن جۇمىستاردىڭ ءتىزىمى ايقىندالدى

استانا. قازاقپارات - استانادا ق ر مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن قازاقستان رەسپۋبليكاسىنىڭ ءال- فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ وتىرىسى ءوتتى، دەپ حابارلايدى قازاقپارات.

 «مەملەكەت تاراپىنان وتاندىق عىلىم مەن تەحنيكا سالاسىنىڭ دامۋىنا زور ءمان بەرىلىپ كەلە جاتقانىن وزدەرىڭىز بىلەسىزدەر. ەلباسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى بيىلعى جولداۋىندا ەكونوميكانىڭ تەحنولوگيالىق تۇرعىدان جاڭعىرۋىن جەدەلدەتۋ ءۇشىن عىلىمدى تەحنولوگيا مەن يننوۆاتسياعا باعىتتاۋ قاجەتتىگىن اتاپ ءوتتى. زەرتتەۋشى عالىمدار، ءوندىرىس جاڭاشىلدارى، عىلىمي- تەحنيكالىق زيالى قاۋىم وكىلدەرى ەل ەكونوميكاسىنىڭ دامۋىنا، ۇلتتىڭ زياتكەرلىك الەۋەتىن نىعايتۋعا ەلەۋلى ۇلەس قوسىپ جاتىر. بۇگىن ءبىز 2017 -جىلعى قازاقستان رەسپۋبليكاسىنىڭ ءال- فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعىن الۋ ءۇشىن ۇسىنىلعان، الدىن الا ىرىكتەۋدەن وتكەن جۇمىستاردى تانىستىرۋ مەن تالقىلاۋ ناتيجەلەرىن قاراستىرامىز جانە ءتىزىمىن بەكىتىپ، قورىتىندى شەشىم قابىلداپ، ەلباسىنا ءوزىمىزدىڭ ۇسىنىسىمىزدى ايتۋىمىز قاجەت»، - دەدى مەملەكەتتىك حاتشى.

وسى ورايدا گ. ءابدىقالىقوۆا ءال- فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعى عىلىم ءارى تەحنيكا قايراتكەرلەرى ەڭبەگىن قوعام مەن مەملەكەت تاراپىنان جوعارى باعالاۋدى بىلدىرەتىنىن اتاپ ءوتتى. اتاپ ايتقاندا، ەكى جىلدا ءبىر رەت 7 سىيلىققا دەيىن بەرىلەدى. اتالعان مەملەكەتتىك سىيلىقتى ق ر پرەزيدەنتى تاۋەلسىزدىك كۇنى قارساڭىندا تاپسىرادى دەپ كۇتىلۋدە.

 بەلگىلى بولعانداي، 2017 -جىلعى سىيلىقتى الۋ ءۇشىن بارلىعى 24 جۇمىس كەلىپ ءتۇستى. الدىن الا ىرىكتەۋدەن سوڭ ەكىنشى كەزەڭگە ونىڭ 11- ءى ءوتتى. ءال- فارابي اتىنداعى عىلىم مەن تەحنيكا سالاسىنداعى 2017 -جىلعى مەملەكەتتىك سىيلىقتىڭ اقشالاي كولەمى 18,6 ميلليون تەڭگەنى قۇرايدى. كوميسسيا وتىرىس قورىتىندىسى بويىنشا سىيلىقتى بەرۋ ءۇشىن مەملەكەت باسشىسىنىڭ قاراۋىنا ۇسىنىلاتىن جۇمىستاردىڭ ءتىزىمىن ايقىندادى.

 اۆتور: رۋسلان عابباسوۆ