ديماشتىڭ لوس- اندجەلەستەگى جانكۇيەرى اقتوبەگە كەلدى

 استانا.قازاقپارات - ديماشتىڭ لوس- اندجەلەس قالاسىندا تۇراتىن جانكۇيەرى اقتوبەگە كەلدى.

پاتريسيا گرۋلليون تانىمال ءانشىنىڭ وسكەن ورتاسى، ءبىلىم العان جەرىمەن تانىسپاقشى، دەپ حابارلايدى Baq.kz ءتىلشىسى

لوس- اندجەلەس قالاسىنىڭ تۇرعىنى اقتوبەگە تابان تىرەدى. ديماش قۇدايبەرگەنوۆتىڭ جانكۇيەرى پاتريسيا گرۋلليون ءانشى ءبىلىم العان اقتوبە مۋزىكالىق كوللەدجىندە بولدى. ۇستازدارىمەن كەزدەسىپ، ديماشتاي شاكىرت تاربيەلەگەنى ءۇشىن العىس ايتتى. پاتريسيا گرۋلليون بولاشاقتا قازاق حالقىنىڭ مادەنيەتىن مەڭگەرىپ، ءتىلىن ۇيرەنگىسى كەلەدى.

«مەن العاش رەت ديماشتىڭ ءانىن تىڭداپ، ونىڭ «قازاقستانعا كەلىڭىزدەر!» دەگەن ءسوزىن ەستىگەنىمدە مۇنى بىردەن شىن جۇرەگىممەن قابىلدادىم. قازاقستان دەگەن كەرەمەت ەلگە كەلدىم. قازاق حالقىنىڭ مادەنيەتىمەن كەڭىنەن تانىسىپ، ءتىلىن مەڭگەرۋ ءۇشىن كەلدىم. جاقسى جاندارمەن جاقىن تانىسقىم كەلدى. تەك ءوز ەلىندە عانا ەمەس، كوپتەگەن وزگە ەلگە تانىمال ديماشتاي كەرەمەت ءانشى شىققان ەلدى جاقىن تانىعىم كەلەدى. ودان وزگە، ديماشتىڭ ءبىلىم العان وقۋ ورنىن ارالاعىم كەلدى. ونىڭ جارقىراپ جانۋىنا ۇلكەن كۇش جۇمساعان ۇستازدارىنا العىس ايتامىن» ، - دەدى پاتريسيا گرۋلليون.

لوس- اندجەلەس تۇرعىنىنىڭ پىكىرىنشە، ديماش قايتالانباس تۇلعا.

«قازىر عالامتوردا ءار ەلدىڭ، اسىرەسە اعىلشىن ءتىلدى ازاماتتاردىڭ ديماشتىڭ تالانتىنا تاڭعالىپ جۇرگەنىن بىلەمىن. الايدا، مەن ونى ەشكىمگە ۇقساتپاس ەدىم. ول - ديماش. ال، ونى بىرەۋمەن سالىستىرسام، تەك مايكل دجەكسونمەن سالىستىرار ەدىم» ، - دەيدى ءانشىنىڭ جانكۇيەرى.

پاتريسيا گرۋلليوننىڭ قاسىندا «ەۋرازيا» جانكۇيەرلەر توبىنىڭ وكىلى يرينا ابدرازاكوۆا ءجۇر. كلۋبتى ديماش قۇدايبەرگەنوۆتىڭ جانكۇيەرلەرى 1  جىل بۇرىن قۇرعان.

«مەن رەسەيدەنمىن. ءبىزدىڭ جانكۇيەرلەر توبى قىتايداعى «I Am a Singer 2017»  بايقاۋىنان بۇرىن قۇرىلدى. ءبىزدىڭ توپتا رەسەي، ۋكراينا، قازاقستان، فرانسيا ەلدەرىنىڭ ازاماتتارى بار. ءبىز ديماشتى قاتتى جاقسى كورەمىز. پاتريسيا ەكەۋمىز ورالدا وتكەن قايىرىمدىلىق گراند بالىن تاماشالادىق. جولدان اقتوبەگە سوعۋدى ءجون كوردىك» ، - دەدى «ەۋرازيا» جانكۇيەرلەر توبىنىڭ وكىلى.

 

اسەل ابات