قازاقستان دەلەگاتسياسى يسلام ۇيىمى اتقارۋشى كەڭەسىنىڭ سەسسياسىنا قاتىستى
2017-جىلعى 3- قازاندا ماروككونىڭ استاناسى رابات قالاسىندا ءبىلىم، عىلىم جانە مادەنيەت ىستەرى جونىندەگى يسلام ۇيىمى (يسەسكو) اتقارۋشى كەڭەسىنىڭ 38-سەسسياسىنا قازاقستاننىڭ مىسىرداعى ەلشىسى ارمان يساعاليەۆ باستاعان قازاقستان دەلەگاتسياسى قاتىستى.
ءىس-شاراعا ماروككو ۇكىمەتىنىڭ مۇشەلەرى، يسەسكوعا مۇشە مەملەكەتتەردىڭ وكىلدەرى، حالىقارالىق ۇيىمداردىڭ دەلەگاتسيالارى جانە اتالعان يسلام ۇيىمنىڭ باسشىلىعى مەن ساراپشىلارى قاتىستى.
كەزدەسۋدە ۇيىمنىڭ 2016-جىلعى اتقارعان جۇمىسى تۋرالى ەسەپ جانە الداعى جوسپارلارى، اتاپ ايتقاندا 2019-2027 ستراتەگياسى تالقىلاندى. ۇيىمنىڭ باس ديرەكتورى ابدۋلازيز ات-تۋيەدجري ق ر پرەزيدەنتى نۇرسۇلتان نازاربايەۆتىڭ باستاماسىمەن جۋىردا استانا قالاسىندا وتكەن عىلىم جانە تەحنولوگيالار جونىندەگى يسلام سامميتىنىڭ ناتيجەلەرىنە جوعارى باعا بەردى.
ءوزىنىڭ بايانداماسىندا قازاقستان دەلەگاتسياسىنىڭ باسشىسى يسەسكونىڭ جۇمىس جوسپارىنا استاناداعى «ەكسپو-2017» كورمەسىنىڭ بۇرىنعى اۋماعىنداعى عىلىمي تەحنولوگيالىق جوبالارعا قاتىسۋىن، قازاقستان باستاعان «جاھاندىق ەنەرگيا جانە ەكولوگيالىق ستراتەگياسى» جانە ب ۇ ۇ باس اسسامبلەياسىنىڭ 66-سەسسياسىندا بەكىتىلگەن «جاسىل كوپىر» ارىپتەستىك باعدارلاماسىنا اتسالىسۋىن قوسۋ تۋرالى ۇسىنىس جاسادى.
سونىمەن قاتار، فورۋمدا استانا قالاسىندا ءۇش جىل سايىن وتەتىن الەمدىك جانە ءداستۇرلى دىندەر ليدەرلەرىنىڭ سەزىنە يسەسكونىڭ قاتىسۋى جانە ازىق-تۇلىك قاۋىپسىزدىگى جونىندەگى يسلام ۇيىمى شەڭبەرىندە ىنتىماقتاستىق ورناتۋ ماسەلەلەرى كوتەرىلدى.
ءىس-شارا اياسىندا ەلشى يسەسكونىڭ باس ديرەكتور مەن كەزدەستى. كەزدەسۋ بارىسىندا قازاقستان مەن ۇيىم اراسىنداعى ىنتىماقتاستىق ماسەلەلەرى، قازاقستاندا ىسكە اسىرىلىپ جاتقان «رۋحاني جاڭعىرۋ» باعدارلاماسى بويىنشا ارىپتەستىك قۇرىپ، بىرلەسكەن جوبالاردى ىسكە اسىرۋ جولدارى قاراستىرىلدى.
