قاراعاندى وبلىسىندا وندىرىستەگى قايعىلى وقيعالار سانى ازايدى

استانا. قازاقپارات - قاراعاندى وبلىسىنىڭ بايلانىس قىزمەتىندە وتكەن كەزەكتى بريفينگ ەڭبەك قۇقىقتارىن قورعاۋ ماسەلەسىنە ارنالدى.

كاسىپورىندارداعى تەكسەرىستەر تۋرالى وبلىستىڭ ەڭبەك ينسپەكتسياسى باسقارماسى باسشىسىنىڭ مىندەتىن اتقارۋشى قاناتبەك بالساريەۆ بايانداپ بەردى.

«مەملەكەتتىك ەڭبەك ينسپەكتورلارىمەن 2017- جىلدىڭ 9 اي ارالىعىندا 1015 ۇيىم تەكسەرىلگەن. 712 ەرەجە بۇزۋ فاكتىلەرى تىركەلگەن، ونىڭ ىشىندە 631 ەڭبەك قاتىناسى بويىنشا بولسا، 74  ەڭبەك قاۋىپسىزدىگى مەن قورعاۋ بويىنشا، 7 حالىقتى جۇمىسپەن قامتۋعا بايلانىستى بولعان. تەكسەرىستەر قورىتىندىسى بويىنشا 346 بۇيرىق جازىلدى»، - دەپ مالىمدەدى سپيكەر.

ەڭبەك قاۋىپسىزدىگىن باقىلاۋ ماڭىزدى باعىت بولىپ تابىلادى، دەپ اتاپ ءوتتى ول.

«قاراعاندى وبلىسىندا ەڭ كوپ جازاتايىم وقيعالار ورىن الاتىن كاسىپورىندار - ول «قازاقمىس»، «ارسەلورميتتال تەمىرتاۋ» كورپوراتسيالارى، سونداي-اق بيۋدجەتتىك ۇيىمدار. مىسالى، جەدەل جاردەم فەلدشەرلەرى، دەنەشىنىقتىرۋ مۇعالىمدەرى زارداپ شەگەدى»، - دەدى قاناتبەك بالساريەۆ.

دەگەنمەن، وتكەن جىلمەن سالىستىرعاندا جۇمىس ورىندارىنداعى قايعىلى وقيعالار سانى ازايعانى بايقالادى.

ەڭبەك ينسپەكتسياسىنىڭ مالىمەتىنشە، 2017- جىلدىڭ 9 اي ارالىعىندا كاسىپورىندارداعى جازاتايىم وقيعالار سانى 123، وتكەن جىلعى سايكەسىنشە مەرزىمدە بۇل كورسەتكىش 132 بولعان. ول وقيعالاردا 140 ادام زارداپ شەگىپ، ونىڭ 25 ى كوز جۇمعان. وتكەن جىلى 151 ادام زارداپ شەگىپ، 29 ءولىم تىركەلگەن.

وبلىسىمىزدىڭ كاسىپورىندارى مەن ۇيىمدارىندا 3500-نان استام ۇجىمدىق كەلىسىمشارتتار ورناتىلعان.

جىل باسىنان بەرى الەۋمەتتىك سەرىكتەستىك بويىنشا وبلىستىق ءۇش جاقتىق كوميسسيانىڭ ءۇش وتىرىسى وتكەن. ونىڭ تالداۋىنا 11 ماسەلە سالىندى، ونىڭ 7 ۋى ەڭبەك قارىم- قاتىناسىن رەتتەۋگە بايلانىستى بولدى.