ورالدا باتاگوي قاريالار بايقاۋى مارەگە جەتتى- فوتو

ورال. قازاقپارات - وبلىستىق قازاق دراما تەاترىندا «رۋحاني جاڭعىرۋ» باعدارلاماسى جانە حالىقارالىق قارتتار كۇنى اياسىندا «اتا ءسوزى - باتا ءسوز» اتتى وبلىستىق باتاگوي قاريالار بايقاۋى مارەگە جەتتى، دەپ حابارلايدى «قازاقپارات» ءتىلشىسى.

  ب ق و مادەنيەت، ارحيۆتەر جانە قۇجاتتاما باسقارماسىنىڭ قولداۋىمەن وبلىستىق حالىق شىعارماشىلىعى ورتالىعى مەن ارداگەرلەر كەڭەسى ۇيىمداستىرعان سايىسقا اۋداندار مەن ورال قالاسىنان ىرىكتەلىپ كەلگەن 15 باتاگوي قاريا قاتىستى. ۇلتتىق سالت- ءداستۇر مەن باتانىڭ تاربيەلىك ءمانىن ناسيحاتتاۋ، كەيىنگى ۇرپاقتى ۇلكەندى قۇرمەتتەي بىلۋگە، اتالى سوزدەن عيبرات الۋعا تاربيەلەۋ، ادالدىق پەن ادىلدىككە، ادامگەرشىلىككە ۇندەۋ باعىتىندا وتكىزىلگەن بايقاۋ بارىسىندا ۇمىتكەرلەر الدىمەن وزدەرىن تانىستىردى.

ەكىنشى كەزەڭدە «ەل ەسىندەگى باتالاردان» ءۇزىندى ايتۋدان باق سىناستى. ال «باتامەن ەل كوگەرەر» اتتى ءۇشىنشى كەزەڭدە ۇيگە بەرىلگەن تاپسىرما - باتا تۇرلەرىن جاتقا ايتىپ، ءتۇرلى كورىنىستەردى كورسەتتى. سايىس قورىتىندىسىندا تاسقالالىق اقساقال جۇماگەلدى ۇمبەتاليەۆ باس جۇلدەنى جەڭىپ السا، قاراتوبەلىك ەرتاي سەردالين ءبىرىنشى، زەلەنوۆتىق ساتىبالدى تولەگەنوۆ پەن جاڭاقالالىق امانجان سالاۋاتوۆ ەكىنشى، شىڭعىرلاۋلىق تەمىرعالي جانتاسوۆ، اقجايىقتىق سىيلىحان زەينەتوۆ، قازتالوۆتىق يسماعۇل مۋسين ءۇشىنشى ورىنعا يە بولدى.

قاتىسۋشىلاردىڭ ءبىرقاتارى ديپلومانت اتانسا، قالعاندارىنا العىسحات تابىس ەتىلدى. بايقاۋدىڭ باس جۇلدەگەرى ج. ۇمبەتاليەۆتىڭ يىعىنا شاپان جابىلىپ، ول جۇرتشىلىققا ءوز باتاسىن بەردى. وبلىستىق حالىق شىعارماشىلىعى ورتالىعىنىڭ ديرەكتورى مىندەتىن اتقارۋشى نۇرگۇل بەرداشيەۆانىڭ ايتۋىنشا، «رۋحاني جاڭعىرۋ» باعدارلاماسى اياسىندا مۇنداي حالىقتىق سيپاتتاعى شارالار جالعاساتىن بولادى.

اۆتور: ەلجان ەرالى