ەلباسى سىرداريانىڭ سول جاعالاۋىنداعى نىسانداردىڭ قۇرىلىسىن كوردى

استانا. قازاقپارات -  قىزىلوردادا ەلباسى سىرداريا وزەنىنىڭ سول جاعالاۋىندا سالىنىپ جاتقان نىسانداردىڭ قۇرىلىسىن كوردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

نۇرسۇلتان نازاربايەۆ  قىزىلوردا قالاسىنىڭ باس جوسپارىمەن جانە ونى تولىق جوسپارلاۋ جوباسىمەن تانىستى.

قازاقستان پرەزيدەنتىنە سول جاعالاۋداعى قۇرىلىس الاڭى  1532 گەكتار جەردى قۇرايتىنى، سونىڭ ىشىندە اۋماعى 500 گەكتار جەرگە ءبىرىنشى كەزەكتە قۇرىلىس جۇرگىزىلەتىنى جونىندە باياندالدى. سونداي- اق، مەملەكەت باسشىسى سول جاعالاۋداعى قۇرىلىستىڭ ەسكيزدەرى مەن ينۆەستيتسيالىق جەر تەلىمدەرىنىڭ سىزباسىن كوردى. ايتا كەتەرلىگى، جوسپار بويىنشا 800 پاتەردى قۇرايتىن تۇرعىن ءۇي كەشەندەرىن، الەۋمەتتىك- مادەني جانە ءبىلىم بەرۋ نىساندارىن سالۋ كوزدەلگەن. سونىمەن قاتار، 100 ادامدى قابىلداي الاتىن ەمحاناسى بار، 300 ادامعا ارنالعان كوپسالالى اۋرۋحانا، 320 بالاعا ارنالعان بالاباقشا، مۋزەي مەن ستۋدەنتتەر قالاشىعى سالىنادى.

نۇرسۇلتان نازاربايەۆ جۇمىس ساپارى بارىسىندا «اراي» سپورتتىق- ساۋىقتىرۋ كەشەنىن دە ارالاپ كوردى. كەشەندە اكۆاپارك، SPA ورتالىعى، بالالارعا ارنالعان ويىن پاۆيلونى، كوتتەدج قالاشىعى، اتتراكسيونداردى قامتيتىن اشىق باسسەيندەر، فيتنەس ورتالىعى، سونداي- اق 500 ادامعا ارنالعان بالالار ورتالىعى بار.

ەلباسى وبلىس جاستارىمەن جانە بالالارمەن كەزدەسىپ، بەيرەسمي اڭگىمە وتكىزدى.