جاقسىلىق دوسقاليەۆ ءوزى ءبىلىم العان مەدۋنيۆەرسيتەتكە التىننان جاسالعان كارتا سىيلادى
اكادەميك جاقسىلىق دوسقاليەۆ ءوزى ءبىلىم العان مەديتسينالىق ۋنيۆەرسيتەتكە 24 كاراتتى التىن كارتا سىيلادى، دەپ حابارلايدى قازاقپارات ءتىلشىسى.
اقتوبە قالاسىندا مارات وسپانوۆ اتىنداعى باتىس قازاقستان مەديتسينالىق ۋنيۆەرسيتەتىنىڭ 60 جىلدىق مەرەيتويى ءوتىپ جاتىر. شاراعا جوعارى وقۋ ورنىن بىتىرگەن تۇلەكتەر شاقىرىلدى. ولاردىڭ اراسىندا رەسپۋبليكالىق ترانسپلانتولوگيا ۇيلەستىرۋ ورتالىعىنىڭ ديرەكتورى جاقسىلىق دوسقاليەۆ تە بار. اكادەميك وزىنە ءتالىم بەرگەن وقىتۋشىلارعا العىس ايتىپ، سىي جاسادى.
«ادامنىڭ سانا- سەزىمى، ىشكى جىلۋى، ادامنىڭ العا جىلجۋى، ءبىر- ءبىرىن ءسۇيۋى سەكىلدى قاسيەتتەردىڭ ءبارى ۋنيۆەرسيتتە داريدى. ۇستازدارىما العىسىم شەكسىز. «ۇيادا نە كورسەڭ، ۇشقاندا سونى ىلەسىڭ» دەگەن بار. وقىتۋشىلاردان العان ءتالىم- تاربيە ومىرىمىزگە ازىق بولدى. مەن اقتوبە مەديتسينالىق ينستيتۋتىندا ءبىلىم العانىمدى، جۇمىس ورنىن وسى جەردە اسسيستەنت بولىپ باستاعانىمدى، ءبىلىم ورداسىن باسقارۋعا مۇمكىندىك بەرىلگەنىن ماقتان ەتەمىن. وقىتۋشىلارىممەن، ۋنيۆەرسيتەتتى بىتىرگەن 25 مىڭ تۇلەكپەن ماقتانامىن. ولاردىڭ ءبارى ەلىمىزدىڭ ءار وڭىرىندە، شەتەلدە اقتوبە ۋنيۆەرسيتەتىن تانىتىپ ءجۇر. بۇل ج و و ءوز ادىستەمەسى، جولى بار. ءتۇرلى سەرىكتەستەر بايلانىس ورناتىپ، اقتوبە ۋنيۆەرسيتەتىنىڭ تاجىريبەسىن مەڭگەرىپ ءجۇر. ءبارى ۇجىمنىڭ ەڭبەگى»، - دەدى جاقسىلىق دوسقاليەۆ.
سوڭىنان اكادەميك سىي جاسادى. ول مارات وسپانوۆ اتىنداعى باتىس قازاقستان مەديتسينالىق مەملەكەتتىك ۋنيۆەرسيتەتىنىڭ تۇلەكتەرى جۇمىس ىستەپ جۇرگەن قازاقستان كارتاسىنىڭ التىن ۇلگىسىن سىيلادى. التىن سىناماسى - 24 كارات.
اۆتور: التىناي ساعىندىقوۆا
