ەلوردادا «قاۋىپسىز قالا» جوباسى تانىستىرىلدى
مەگاپوليس ءۇشىن بارىنشا قىزىقتى ءارى وزەكتى جوبالاردىڭ ءبىرى «قاۋىپسىز قالا» دەپ اتالادى.
Huawei كومپانياسىنىڭ ساراپشىسى سەرگەي شاتوحيننىڭ ايتۋىنشا، بۇل جۇيە بىرنەشە كومپونەنتتەن تۇرادى.
«اتاپ ايتقاندا، بۇل ديسپەتچەرلەردە بار سىمسىز جانە سىمدى بايلانىس قۇرالى. ول كارتادان بارلىق ادامداردى، شولعىنشى كولىگىن جانە باسقا نىسانداردى كورۋگە مۇمكىندىك بەرەدى. كەز كەلگەن كامەرادان ۆيدەونى ەش كەدەرگىسىز الىپ، ونى تەرمينالدارى ارقىلى جىبەرە دە الادى. ۆيدەوباقىلاۋ - بۇل جۇيەنىڭ شاعىن بولىكتەرىنىڭ ءبىرى عانا. ماسەلەن، قوڭىراۋ باسقارۋ ورتالىعىنا ۇيالى جەلىدەن نەمەسە باسقا تەلەفوننان تۇسسە دە وپەراتوردىڭ الدىندا ادامنىڭ قاي جەردەن حابارلاسىپ تۇرعانى كورىنەدى»، - دەدى ول.
ساراپشىنىڭ اتاپ وتۋىنشە، سول ارقىلى وپەراتور نىساناعا جاقىن جەردە قانداي كۇشتەردىڭ، قۇرالدىڭ، قاجەتتى سەكتوردا قانداي باقىلاۋ كامەراسىنىڭ بار ەكەندىگىن ءبىلىپ وتىرادى.
«سودان كەيىن ول ۆيدەونى شولعىنشىعا جىبەرىپ، ونىڭ تەرمينالىندا كارتا پايدا بولادى جانە قاي باعىتتا ءجۇرۋ كەرەكتىگىن بىردەن تۇسىنەدى. وپەراتور مەن شولعىنشى اراسىندا اتالعان جۇيە اياسىندا داۋىس جانە ۆيدەو بايلانىسى بولادى»، - دەدى شاتوحين.
وسى رەتتە ول اتالعان جۇيەنىڭ قۇنى قانشالىقتى بولاتىندىعىن ايتا المادى. دەگەنمەن، ونىڭ قىتايدىڭ، ساۋد ارابياسى مەن پاكىستاننىڭ كوپتەگەن قالالارىندا جۇمىس ىستەپ تۇرعاندىعىن اتاپ ءوتتى.
اۆتور: مارلان جيەمباي
