ۇشاق اپاتىنان مەرت بولعان تالعات پاتسايەۆ شىمكەنتتە جەرلەندى

شىمكەنت. قازاقپارات - الماتى ماڭىنداعى ۇشاق اپاتىندا قازا تاپقان دارىگەرلەردىڭ ءبىرى تالعات پاتسايەۆ بۇگىن تۋعان جەرى شىمكەنتتە جەرلەندى.

بىلىكتى دارىگەر، پروفەسسوردى تۋعان-تۋىستارى مەن جورا-جولداستارى، ارىپتەستەرى اقتىق ساپارعا شىعارىپ سالدى، دەپ حابارلايدى قازاقپارات ءتىلشىسى.

ايتا كەتەيىك، 46 جاسىندا دۇنيەدەن وزعان تالعات پاتسايەۆ «اكۋشەرلىك جانە گينەكولوگيا» بويىنشا مەديتسينا عىلىمدارىنىڭ دوكتورى بولاتىن. ءۇش ءتىلدى ەركىن مەڭگەرگەن ءوز ءىسىنىڭ بىلىكتى مامانى ەدى.

توقسانىنشى جىلدارداعى توقىراۋ جىلدارى وڭتۇستىك قازاقستان وبلىستىق پەرزەنتحانادا كوپ جىلدار بويى اكۋشەر-گينەكولوگ بولىپ قىزمەت اتقارعان. ال، 2009-جىلدان قازىرگى تاڭعا دەيىن ق ر دەنساۋلىق ساقتاۋ مينيسترلىگىنىڭ اكۋشەرلىك ءىس، گينەكولوگيا جانە پەريناتولوگيا عىلىمي ورتالىعىنىڭ وپەربلوك مەڭگەرۋشىسى بولىپ ەڭبەك ەتتى.

جوعارعى ساناتتاعى مامان بولعان. جۇبايى نۇرجامال جاردەماليەۆامەن ەكى ۇل تاربيەلەپ، وسىرگەن. بۇگىن ەلىنە ادال قىزمەت اتقارعان ازاماتتى سوڭعى ساپارعا شىعارىپ سالۋ راسىمىندە ونى ارىپتەستەرى، جولداستارى ءبىر ءسات ەسكە الىپ، ءسوز سويلەدى.

«ءبىز تالعات پاتسايەۆپەن 20 جىلداي بىرگە جۇمىس ىستەدىك. ول كانديداتتىعىن قورعادى، كەيىننەن دوكتورلىعىن دا قورعاپ شىقتى. شاپشاڭ قيمىلدايتىن ءارى تالانتتى دارىگەر بولاتىن. سونىمەن قاتار ۇجىمداستارىنىڭ الدىندا دا تاماشا ادام ەدى. كەز-كەلگەن ۋاقىققا قول ۇشىن بەرۋگە دايىن تۇراتىن. الماتىدا جۇرسە دە شىمكەنتتەگى ارىپتەستەرىنە جوق دەپ ايتپايتىن، قاي ۋاقىتتا بولماسىن اقىل كەڭەستەرىن بەرىپ، ايىنا ەكى رەت كەلىپ جۇرەتىن. بالالارى ءالى جاس. كىم بىلەدى، بولاشاقتا ولار دا اكە جولىن قۋىپ، ونىڭ ءىسىن جالعاستىرار دارىگەر بولاتىن شىعار»، - دەيدى ارىپتەس دوسى، مەديتسينا عىلىمدارىنىڭ دوكتورى، پروفەسسور تالعات قۇدايبەرگەنوۆ.

تالعات پاتسايەۆ سونداي-اق قازاقستان مەديتسيناسىندا العاش رەت باۋىردان دونور بولعان ايەلدىڭ جۇكتىلىك كەزىن باقىلاپ، ونى بوساندىرىپ العان دارىگەر سانالادى. جاقسى كۇتىم مەن دارىگەرلىك باقىلاۋدىڭ ارقاسىندا الماتىلىق مادينا نۇرسۇلان قىزى ومىرگە ساۋ بالانى اكەلدى. مارقۇم بولعان ماماننىڭ اكەسى ءاناپيا پاتسايەۆ تا تانىمال پروفەسسور، مەديتسينا عىلىمدارىنىڭ دوكتورى. اناسى دا حيميا سالاسىنىڭ عالىمى، تۋعان اپكەسى دە اكەسىمەن بىرگە دارىگەرلىك قىزمەت اتقارادى.

«تالعات پاتسايەۆتى تۋا بىتكەن دارىگەر دەسە دە بولادى. جۇمىسىن وتە جاقسى كورەتىن. وزگەلەردى دە ۇيرەتىپ، ءوزى دە ۇيرەنۋدەن جالىققان ەمەس. قاي كەزدە بولماسىن ول ازاماتتان كومەك تە، قولداۋ دا كۇتۋگە بولاتىن. دارىگەر اراسىندا دا وتە بەدەلدى، سىيلى جان ەدى. ارينە، اپات ايتىپ كەلمەيدى، ءبىراق سونداي ازاماتتى جوعالتىپ الۋ بارىمىزگە دە اۋىر ءتيدى، قابىرعامىزدى قايىستىرىپ كەتتى دەسە دە بولادى. نە دەيمىز، ەندى يمانى وزىنە جولداس بولسىن، قازانىڭ ارتى قايىرلى بولسىن»، - دەيدى مارقۇمنىڭ جولداسى ءارى ارىپتەسى ەرلان تاجىبايەۆ. مارقۇمنىڭ جانازاسىن شىعارۋعا حالىق كوپ جينالدى. قۇران باعىشتالىپ بولعان سوڭ، ونىڭ دەنەسى بۇگىن شىمكەنتتەگى زيراتتاردىڭ بىرىنە جەر قوينىنا تاپسىرىلدى.

ەسكە سالايىق، 3- قازاندا الماتىدان شىمكەنتكە دارىگەرلەر بريگاداسى اۋىر جاعدايدا جاتقان جۇكتى ايەلگە كومەكتەسۋ ءۇشىن سانيتارلىق اۆيارەيسىمەن جولعا شىققان بولاتىن. «ان-28» ۇشاعى ارتىنشا روداردان جوعالىپ كەتىپ، ۇشاق الماتى وبلىسى ىلە اۋدانىنىڭ مەجدۋرەچينسك اۋىلى ماڭىندا اپاتقا ۇشىراعان ەدى. اپات سالدارىنان بورت ەكيپاجىنىڭ ءۇش مۇشەسى مەن ەكى دارىگەر قازا تاپتى.

اۆتور: اينۇر اقبايەۆا