عالىمدار ۇيدە مىسىق اسىراۋدىڭ كوپتەگەن پايداسىن انىقتادى

استانا. قازاقپارات - راسىندا دا حالىق اراسىندا اسىراندى ءۇي مىسىعىنا قاتىستى نەشە ءتۇرلى پىكىرلەر بار.

بازبىرەۋلەر سىرقات ادامداردى اۋرۋدان مىسىق ايىقتىرادى دەسە، ەكىنشىلەرى قاراما- قارسى تۇجىرىم ايتادى.

دەسەك تە، جاقىندا نەمىس عالىمدارى جاعىمدى جاڭالىقتىڭ شەتىن شىعاردى، ولار عىلىمي نەگىزگە سۇيەنە وتىرىپ تۇجىرىم جاسادى، دەپ جازادى ايقىن.

مەلبۋرن ۋنيۆەرسيتەتىنىڭ ماماندارى جاقىندا ۇزاق ۋاقىت بويى كۇيزەلىستە جۇرگەن ادامدارعا سىناق جۇرگىزگەن كورىنەدى. ولاردى اۋىر جاعدايدان شىعارۋ ءۇشىن جاندارىنا مىسىق جىبەرگەن. ەركەلەگەن مىسىقتىڭ باسىنان سيپاعان سايىن كۇيزەلىستە جۇرگەندەردىڭ وڭىندە ۋاقىت وتە كەلە وزگەرىس بايقالعان. جۇيكەلەرى دە تىنىشتالا باستاعان. ءتىپتى ولار ءبىر اپتادان كەيىن كۇيزەلىستەن تەز شىعىپ كەتكەن كورىنەدى.

ءتىپتى بۇل جاڭالىقتان كەيىن تورونتو عالىمدارى دا ارنايى زەرتتەۋ جۇمىستارىن جۇرگىزگەن. «جالپى حايۋاناتتاردىڭ ادامنىڭ جۇيكەسىنە اسەر ەتۋى قانداي؟» دەگەن ساۋال دا باستى ورىنعا شىققان. اقىرىندا ىزدەنىس جۇمىستارى كورسەتكەندەي، كۇيزەلىستە جۇرگەن ادامنىڭ «ەڭ جاناشىرى» مىسىق بولعان. اسىرەسە جالعىزىلىكتى جانداردىڭ سەنىمدى سەرىگى مىسىق ەكەن. ۇيىندە مىسىق ۇستايتىن ادامدارعا زەرتتەۋ جۇرگىزگەن فينليانديا مەن نورۆەگيانىڭ ماماندارى دا تاڭقالارلىق ناتيجەنى بايقاعان.

مىسىعى بار ادامدار باسقالارمەن سالىستىرمالى تۇردە قاراعاندا جۇرەك-قان تامىرلارى سىرقاتىنا سيرەك شالدىعادى ەكەن. مىسىقتىڭ پايداسى بار ەكەنىن اعىلشىن عالىمدارى دا جوققا شىعارمايدى.  ۇلى بريتانيادا ۇيىندە مىسىعى بار ەرلەردىڭ 70 پايىزى 85 جاسقا دەيىن ءومىر سۇرگەن. ستەنفورد ۋنيۆەرسيتەتىنڭ عالىمدارى ءۇي جانۋارلارىن ۇستايتىندار راك سىرقاتىنا سيرەك شالدىعاتىنىن ايتادى. عالىمداردىڭ باسىم كوپشىلگى جانىڭا ەركەلەپ كەلگەن مىسىقتى باسىنان سيپالاۋ ادامنىڭ قان قىسىمىن تومەندەتىپ، كۇيزەلىستى جويادى دەگەن پىكىرگە باسىمدىق بەرىپ وتىر.