ساپاربايەۆ ەلباسىنا اقتوبەنىڭ الەۋمەتتىك-ەكونوميكالىق ءوسىمىن باياندادى

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ ق ر پرەزيدەنتىنە ءوڭىردىڭ الەۋمەتتىك-ەكونوميكالىق ءوسىمىن باياندادى، دەپ حابارلايدى قازاقپارات ءتىلشىسى.

وڭىرگە جۇمىس ساپارىمەن كەلگەن ەلباسى نۇرسۇلتان نازاربايەۆ اقتوبە فەرروقورىتپا زاۋىتىندا، اقتوبە رەلس-ارقالىق زاۋىتى مەن جىلىجاي كەشەنىندە، بيزنەستىڭ الەۋمەتتىك جاۋاپكەرشىلىگى اياسىندا سالىنعان بىرنەشە نىساندا بولدى.

اقتوبەلىك بەلسەندىلەرمەن، كاسىپكەرلەرمەن، ونەر ادامدارىمەن كەزدەستى. جۇبانوۆتار الەمى ورتالىعىن، شىعارماشىلىق اكادەمياسى مەن ونەر ورداسىنىڭ قۇرىلىسىن قاراپ شىقتى.

ساپار كەزىندە پرەزيدەنتكە اقتوبە وبلىسىنىڭ اكىمى بەردىبەك ساپاربايەۆ 8 ايدىڭ قورىتىندىسىن باياندادى.

وبلىستىق اكىمدىكتىڭ باسپا ءسوز قىزمەتىنىڭ حابارلاۋىنشا، وڭىردە ەكونوميكانىڭ بارلىق سەكتورىندا ءوسىم بار. ونەركاسىپتىك ءوندىرىستىڭ يندەكسى %104,9، اۋىل شارۋاشىلىق ءوندىرىسى %102,7، ينۆەستيتسيا %130 دەڭگەيدە. قۇرىلىس كەشەنىندەگى جۇمىس كولەمى %111,9 قۇراپ، 337 مىڭ شارشى مەتر تۇرعىن ءۇي پايدالانۋعا بەرىلدى.

«كاسىپورىنداردى جاڭعىرتۋ اياسىندا مامانداردىڭ بىلىكتىلىگىن جەتىلدىرۋ جانە قايتا دايارلاۋ ءۇشىن 30 ءىرى كومپانيامەن كەلىسىمگە قول قويىلدى. بۇگىندە 10 كاسىپورىن جاڭعىرتىلدى. 2017-جىلى جالپى سوماسى 18 ميلليارد تەڭگە تۇراتىن 20 كومپانيانى جاڭعىرتۋ كوزدەلۋدە. ناتيجەسىندە ەڭبەك ونىمدىلىگى %12 ارتىپ، ونىمدەردى ءوندىرۋ مەن قايتا وڭدەۋدىڭ وزىندىك قۇنى %3 تومەندەيدى. سونىمەن قاتار، وسى جىلدىڭ ءبىرىنشى توقسانىنىڭ قورىتىندىسى بويىنشا قابىلدانعان شارالاردىڭ ارقاسىندا وڭدەۋ ءوندىرىسىنىڭ وبلىس ەكونوميكاسىنا قوسقان ۇلەسى ارتتى. جۇمىسسىزدىق %4,8 دەڭگەيىندە ساقتالىپ تۇر، ياعني بيىل 11,3 مىڭ جاڭا جۇمىس ورنى اشىلدى»، - دەپ حابارلادى وبلىس اكىمىنىڭ باسپا ءسوز قىزمەتى.

اقتوبە وبلىسىنىڭ اكىمى بەردىبەك ساپاربايەۆ «رۋحاني جاڭعىرۋ: بولاشاققا باعدار» باعدارلامالىق ماقالاسىنداعى تاپسىرمالاردىڭ ورىندالۋىنا توقتالدى. ونىڭ سوزىنشە، بۇل باعىتتا اۋقىمدى جۇمىس اتقارىلعان. «تۋعان جەر» رەسپۋبليكالىق فورۋمى كەزىندە وڭىرگە 21 ەلدەن 300 دەن اسا اقتوبەلىك كەلدى. ناتيجەسىندە 25 كۇردەلى وپەراتسيا جاسالىپ، جۇزدەن استام كەزدەسۋ، سەمينارلار مەن شەبەرلىك ساباقتارى وتكىزىلدى.

جالپى قۇنى 76 ميلليارد تەڭگە بولاتىن 20 مەموراندۋمعا قول قويىلدى. فورۋم قاتىسۋشىلارى ايماقتىڭ دامۋىنا تاعى 5 ميلليارد تەڭگە كولەمىندە دەمەۋشىلىك كورسەتەدى. بەردىبەك ساپاربايەۆ مەملەكەتتىك-جەكە مەنشىك سەرىكتەستىك پەن بيزنەستىڭ الەۋمەتتىك جاۋاپكەرشىلىگىن دامىتۋ اياسىندا اتقارىلعان جۇمىستاردى دا باياندادى. وڭىردە قۇنى 50 ميلليارد تەڭگەدەن اساتىن 125 جوبا جۇزەگە اسىرىلىپ جاتىر.

اۆتور: التىناي ساعىندىقوۆا