قازاق ءتىلىن جەتىك بىلمەسەم دە قىزىم تۋعان تىلىندە تازا سويلەيدى - دينارا ءشايجۇنىسوۆا
قور باسشىسى وسى ىسپەن نە ءۇشىن اينالىسىپ جاتقانىن ايتقاندا كوز جاسىن دا جاسىرمادى، دەپ حابارلايدى قازاقپارات ءتىلشىسى.
«مەن ءوزىم قازاقستان جەرىندە تۋعان جوقپىن. سودان بولار، تۋعان تىلىمدە جەتىك سويلەي المايمىن. ءبىراق بالالارىمنىڭ انا تىلىندە سويلەگەنىن قالادىم. بايقاپ قاراسام، بالالاردىڭ ءبارى Disney مۋلتفيلمدەرىن جاقسى كورەدى. ءسويتىپ، ول تۋىندىلاردى قازاق تىلىندە دۋبلياجداۋ باستاماسى قولعا الىندى. قازىر كىشكەنتاي قىزىم تۋعان تىلىندە تازا سويلەپ ءجۇر. سوندىقتان تەلەديداردا قازاق تىلىندە دۋبلياجدالعان فيلمدەردى كوپتەپ كورسەتۋ كەرەك»، - دەيدى ءشايجۇنىسوۆا.
ونىڭ ايتۋىنشا، «بولاشاق» كورپوراتيۆتى قورى شەتەلدىك فيلمدەردى دۋبلياجداۋدان تابىس كورىپ جاتقان جوق. ونىڭ باستاپقى ماقساتى - شالعاي جاتقان اۋىلداعى ءاربىر قازاق بالاسىنا الەمنىڭ ۇزدىك تۋىندىلارىن تۋعان تىلىندە جەتكىزۋ. وسى ۋاقىتقا دەيىن 23 فيلم قازاق تىلىنە اۋدارىلدى. «قازىر ءوز ەلىمىزدەگى قازاقتار عانا ەمەس، شەتەلدەگى ميلليونداعان قانداستارىمىز ول تۋىندىلاردى كورىپ كەلەدى. ال قازاقتىڭ جۇزدەگەن اكتەرىنىڭ داۋىسى Disney- ءدىڭ بازاسىنا ەندى. گۇلناز اۋەزباي، ازامات قاناپيا، بەرىك ايتجان سىندى ارتىستەرىمىز دجوني دەپ، انجەلينا دجولي پەن ۋيلل سميتتەردى قازاق تىلىندە سويلەتە ءبىلدى. ولار الەمگە تانىمال گولليۆۋد اكتەرلەرىن جەتى جىل بويى دۋبلياجداۋعا مۇمكىندىك الدى»، - دەپ اتاپ كورسەتتى قور باسشىسى.
ايتا كەتكەن ءجون، اعىمداعى جىلدا «بولاشاق» كورپوراتيۆتى قورىنىڭ باستاماسىمەن بەس تۋىندى قازاق تىلىنە اۋدارىلدى. «23 - «كوكونىڭ قۇپياسى» دەگەن تاعى ءبىر مۋلتفيلم شىعادى. ونداعى اۋدارما عانا ەمەس، سسەناريدىڭ تابيعاتى دا قازاققا جاقىن. مۋلتفيلمدە قازاق حالقىنىڭ قۇندىلىقتارىن، تاڭىرشىلدىكتى دە انىق بايقاۋعا بولادى»، - دەيدى دينارا ءشايجۇنىسوۆا.
اۆتور: ارمان اسقاروۆ
