قازاق ءومىرى لوندوندا ساحنالاندى - فوتو
دەپ حابارلايدى قازاقپارات ق ر مادەنيەت جانە سپورت مينيسترلىگىنىڭ باسپا ءسوز قىزمەتىن سىلتەمە جاساپ.
ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى وزەكتى ماقالاسى قوعامدا كەڭىنەن تالقىلانىپ جاتىر. بۇگىنگى وسكەلەڭ ۇرپاق بولاشاققا باسقان قادامدارىن قالاي سارالاپ، بۇقارالىق سانانى قالاي وزگەرتەتىنىمىز جان- جاقتى باعالانعان تۋىندى شەت ەلدەردە دە قىزىعۋشىلىق تانىتىپ وتىر. مۇنى ق ر مادەنيەت جانە سپورت مينيسترلىگى تاراپىنان ۇيىمداستىرىلىپ جاتقان ءتۇرلى شارالار بارىسىندا دا، اسىرەسە شەت ەلدەردە ءوتىپ جاتقان ايتۋلى ءىس- شارالار وتكىزگەندە ايقىن اڭعارامىز. بۇعان تاياۋدا جازۋشى، دراماتۋرگ دۋلات يسابەكوۆتىڭ «جاۋجۇرەك» پەساسى لوندون تەاترىندا ساحنالانعانىندا تاعى كوز جەتكىزدىك.
دراماتۋرگتىڭ 75 جاسقا كەلۋىنە وراي ۇيىمداستىرىلعان بۇل شاراعا كورەي، اعىلشىن تەاترلارى دا قاتىسقان ەكەن. وسىنداي بەدەلدى وزگە ەلدەر تەاتر مايتالماندارى اراسىندا ءبىزدىڭ وتاندىق تۋىندىمىز، ءوزىمىزدىڭ ارتىستەرىمىز ورىنداۋىندا ساحناعا شىعۋى قۋانتادى. سونىمەن، بالۋان شولاقتاي سەگىز قىرلى، ءبىر سىرلى ەل ارداقتىسى پەسا جەلىسىنىڭ باستى تۇلعاسىنا اينالعان قويىلىم ەۋروپا مادەنيەتىنىڭ بەدەلدى وشاعى - لوندوندا ساحنالاندى. ءدال وسى قويىلىمنىڭ ۇلى بريتانيا استاناسىنداعى القالى فەستيۆال شىمىلدىعىن اشۋى دە تەگىن ەمەس. ءبىر عانا كەيىپكەر ارقىلى قازاق حالقىنىڭ باستان كەشكەن اۋىر تاعدىرى، كەشەگى يمپەريالىق پيعىل مەن سۇراپىل ساياساتتى اكتەرلەر ەكى ساعاتتا كورەرمەننىڭ كوز الدىنا اكەلىپتى. سونىمەن قاتار قازاق دالاسىنىڭ دارحان مىنەزىن، ونەرىن بالۋان شولاقتىڭ ءرولىن سومداعان اكتەر ەرلان ءبىلال تاماشا جەتكىزدى، دەيدى تەاتر ونەرىنىڭ ساراپشىلارى.
ادەبيەت تانۋشى سارا كوپلەي قازاق جازۋشىسى د. يسابەكوۆ تۋىندىلارىمەن بۇرىن دا تانىس ەكەنىن، ال مىنا «جاۋجۇرەك» پەساسىنىڭ ءساتتى ساحنالانۋى ونى جاڭا ءبىر قىرىنان تانۋىنا ىقپال ەتكەنىن جاسىرمايدى.
«جالپى دۋلات يسابەكوۆتىڭ شىعارمالارى تاريحي دۇنيەنى الىستان ءارى تۋرا جەتكىزەدى، مەنىڭ ونى ءسۇيسىنىپ وقيتىنىما دا سول سەبەپ»، - دەپ ول اعىنان جارىلادى. بريتان- قازاق قوعامىنىڭ ءتوراعاسى رۋپەرت گۋدمان دا اكتەرلەردىڭ شەبەرلىگىنە ءتانتى بولعانىن ايتادى. «قويىلىمدا ەلدىڭ تاريحى دا، مادەنيەتى دە بار. مۇندا تەك قازاقتىڭ جاعدايى عانا ەمەس، حالىقارالىق ماسەلە دە قوزعالدى. جالپى قازاق تەاترىنىڭ لوندونعا كەلىپ ونەر كورسەتۋى جاقسى ءداستۇر»، دەيدى ول.
قازاق تەاترىنىڭ لوندونعا جول تارتۋى داستۇرگە اينالدى دەۋگە بولادى، دەيدى فەستيۆال ۇيىمداستىرۋشىلارى. بيىل 75 جاسقا كەلىپ وتىرعان جازۋشى، دراماتۋرگ دۋلات يسابەكوۆتىڭ شىعارماسى مۇندا وسىمەن ەكىنشى رەت ساحنالانىپ وتىر ەكەن. قازاق ونەرىن، ادەبيەتىن، تاريحىن وسىنداي تەاتر فەستيۆالى ارقىلى الەمگە تانىتۋ - ءبىزدىڭ پرەزيدەنتىمىز نۇرسۇلتان ءابىش ۇلى نازاربايەۆ حالقىمىزدىڭ الدىنا قويعان ماڭىزدى مىندەت - رۋحاني جاڭعىرۋدىڭ ءبىر كورىنىسى، دەدى ءوز سوزىندە قازاقستان رەسپۋبليكاسىنىڭ ۇلى بريتانياداعى ەلشىسى ەرلان ىدىرىسوۆ.
- نەگىزى ەلشى مەن ەمەس، ناعىز ەلشى - ونەر ادامدارى، مۋزىكانت، اكتەر، سپورتشىلار. ويتكەنى، مادەنيەتىمىز ارقىلى، سپورتتىق جەتىستىكتەرىمىز ارقىلى ءبىزدى ەل تانيدى، ونەر ارقىلى ەلدىڭ رۋحاني جاندۇنيەسىن جەتكىزەتىن، جۇرەگىن جەتكىزەتىن دە وسى ادەبيەت، تەاتر تۇلعالارى، - دەدى ەرلان ىدىرىسوۆ.
وسى فەستيۆال اياسىندا دۋلات يسابەكوۆتىڭ پەسالار جيناعى اعىلشىن تىلىندە جارىق كوردى. مىنا العاشقى نۇسقاسى ءدال وسى بريتانيا پارلامەنتى عيماراتىندا لوندون لوردىنا تابىس ەتىلدى. ال ستوكحاۋز تەاترىندا باستاۋ العان قازاق تەاترىنىڭ فەستيۆالى ەندى ءبىر اپتا بويى برايدۋەلل تەاترىندا كورەي، اعىلشىن اكتەرلەرىنىڭ قاتىسۋىمەن وتەدى. جازۋشى دۋلات يسابەكوۆ مۇنىڭ بارلىعىنىڭ تاۋەلسىزدىكتىڭ ارقاسى ەكەنىن ايتۋدا. سونىمەن قاتار تانىمال جازۋشى ءدال قازىر ەلىمىزدە كەڭىنەن قانات جايعان رۋحاني جاڭعىرۋ ۇدەرىسىنىڭ دە حالىقتى شىنايى سەرپىلتكەنىن، ۇلتتىق تاريحىمىزدى تىڭنان سارالاپ، سانا- سەزىمىمىزدى دە قازاق ەلىنىڭ ەرتەڭىنە ۇلكەن سەنىممەن قاراۋعا جەتەلەپ وتىرعانىن شەتەلدىكتەر الدىندا تىلگە تيەك ەتتى.
