ءۇش جاسار تارازدىق ءبۇلدىرشىن «ازيا ارۋى» اتاندى - فوتو

استانا. قازاقپارات - قىركۇيەكتىڭ باسىندا استاناداعى «قازاقستان» ورتالىق كونسەرت زالىندا «ازيا ارۋى» سۇلۋلىق بايقاۋى ءوتتى.

تارازداعى FABUS مودەلدىك مەكتەبىنىڭ تاربيەلەنۋشىلەرى كاستينگكە قاتىسىپ، قاتاڭ ىرىكتەۋدەن وتكەن. قىزىعى سول، ەڭ جاس قاتىسۋشى، 3 جاسار سوگديانا ناجمۋدينوۆا «Little Miss World Asia Beauty 2017»  بايقاۋىنىڭ گران-پري يەگەرى اتاندى.

بۇل تۋرالى ZhambylNews باسىلىمى حابارلايدى.

كىشكەنتاي سوگديانا ازيانىڭ ەڭ سۇلۋ مودەلى اتانادى دەپ كىم ويلاعان؟ قىزدىڭ اناسى كارينا ناجمۋدينوۆا ءتىپتى، بۇل تۋرالى ارماندامادىم دەيدى. سەبەبى كىشكەنتاي حانشايىم نەبارى 3,5 جاستا. اناسى سوگديانانى «Fabus» مودەلدىك مەكتەبىنە شامامەن ءبىر جىل بۇرىن الىپ كەلگەن.

«شىنىمدى ايتسام، بالا كۇنىمدە ءوزىم مودەل بولۋدى ارماندادىم. قىزدى بولعان سوڭ، ويلانباستان ونى مودەل مەكتەبىنە بەردىم. سوگديانا وتە اقىلدى قىز جانە ساحنادان قورىقپايدى. بالاباقشادا مەرەكەلىك تاڭەرتەڭگىلىككە العاش قاتىسقان كەزدە ول مۇلدەم قوبالجىعان جوق. ءوزى جۇرتتىڭ تاڭدانىپ قاراعانىن ۇناتادى. ساحنا - ونىڭ مەكەنى»، - دەيدى كارينا.

سوگديانا مودەل مەكتەبىنە قۋانا-قۋانا باراتىن. ول نەبارى 3,5 جاسىندا وقۋدى اياقتاپ، سەرتيفيكات العان.

اتاپ وتەتىن جايت، ءبىزدىڭ كەيىپكەر «Mimioriki» دۇكەندەر جەلىسىنىڭ بەت-بەينەسىنە اينالعان. اناسىنىڭ ايتۋىنشا، ونى ءارتۇرلى كورسەتىلىمدەر مەن تۇسىرىلىمدەرگە ءجيى شاقىرىپ تۇرادى.

«قىزىمىز مودەلدىك مەكتەپتى بىتىرگەنى تۋرالى سەرتيفيكاتتى يەلەنگەن سوڭ، ءبىز «ازيا ارۋى» بايقاۋىنا قاتىسۋعا ءوتىنىش بىلدىردىك. اتالعان بايقاۋ قىركۇيەك ايىندا استانادا وتكەن بولاتىن. بۇل باسەكەگە بۇكىل وتباسىمىزبەن ءبىر اي بويى دايىندالدىق»، - دەپ اتاپ ءوتتى اناسى.

ايتا كەتەيىك، سوگديانا سۇلۋلىق بايقاۋىندا كيىپ شىققان كيىمدەردى ناجمۋدينوۆتەر وتباسى وزدەرى تىككەن. ال ءبيدى بالاباقشاداعى حورەوگراف ۇيرەتىپتى.

«شىنىن ايتقاندا، ساحنا سىرتىندا كۇيەۋىم ەكەۋمىز قاتتى الاڭدادىق. ال سوگديانا ءوزىن تىم سەنىمدى ۇستادى، قۇددى جەڭىسكە جەتەتىنىن بىلگەندەي»، - دەيدى كارينا.

اتالعان سۇلۋلىق بايقاۋىنا قازاقستان، قىرعىزستان، وزبەكستان، رەسەي، تاجىكستان ەلدەرىنەن ءارتۇرلى جاستاعى 200 قىز قاتىسقان.

«ماراپاتتاۋ سالتاناتىندا قاتتى قوبالجىدىق. قىزىم قايتا- قايتا: «ماما، ماعان قاشان ءتاج كيگىزەدى؟» - دەپ سۇراۋمەن بولدى. باسقا قىزدارعا ءارتۇرلى سەرتيفيكاتتار، لەنتالار مەن اتالىمدار تابىستاپ جاتقاندا سوگديانانىڭ قولى بوس قالدى. كوڭىل- كۇيى ءتۇسىپ كەتە مە دەپ الاڭدادىم. ءبىراق قىزىم «Little Miss World Asia Beauty-2017» بايقاۋىنىڭ گران- پري يەگەرى اتاندى. ول بايىپتى كۇيدە ءتاجى مەن لەنتاسىن قابىلداپ، ەلدىڭ قوشەمەتىمەن ساحنادان كەتىپ قالدى. قۇددى سولاي بولۋى كەرەكتەي»، - دەيدى كارينا ناجمۋدينوۆا.

قازىر سوگديانا قاراشادا ماسكەۋدە وتەتىن «عالامشار ارۋى» بايقاۋىنا دايىندالۋدا.