قوستانايدا قازاقتىڭ ۇلى اعارتۋشىسىنا كەسەنە اشىلدى - فوتو

قوستاناي. قازاقپارات - قوستاناي اۋدانىندا ۇستازدار كۇنىنە وراي جاڭارتىلعان ى. التىنسارين كەسەنەسى سالتاناتتى تۇردە اشىلدى، دەپ حابارلايدى قازاقپارات ءتىلشىسى.

شاراعا قوستاناي وبلىسىنىڭ اكىمى ارحيمەد مۇحامبەتوۆ، اۋداندار مەن قالالاردىڭ اكىمدەرى، وبلىستىق باسقارمالار مەن دەپارتامەنتتەر باسشىلارى، ەڭبەك ارداگەرلەرى قاتىستى.

 

الدىمەن، ۇلى ۇستازدىڭ رۋحىنا قۇران باعىشتالدى. وبلىس اكىمى ۇلى اعارتۋشى كەسەنەسىنىڭ جاڭارتىلۋىنا 81 ميلليون تەڭگە كولەمىندە قارجى بولىنگەنىن ايتتى.

«جاقىندا كەيكى باتىر، شاقشاق جانىبەك كەسەنەلەرىن اشتىق. ال ىبىراي التىنسارين كەسەنەسىنىڭ اشىلۋى - بيىلعى جىلى جۇرگىزىلىپ جاتقان رۋحاني شارالاردىڭ ءبىر پاراسى. بۇل قاراجاتقا كەسەنەنى جوندەۋ جانە سول ايماقتى اباتتاندىرۋ قاراستىرىلعان. كەلەشەكتە كەسەنە ماڭايىندا جاڭا ساياباق پايدا بولادى. كەسەنەنىڭ مەردىگەرى ماڭعىستاۋ رەستاۆراتسيالىق كومپانياسىنا العىس ايتامىن»، - دەدى ارحيمەد مۇحامبەتوۆ.

مۇنان سوڭ مەكتەپ وقۋشىلارى ى. التىنسارين ولەڭدەرىن جاتقا وقىدى.

 

«شىن مانىندە ۇلى ءىستىڭ كۋاسى بولىپ وتىرمىز. ىبىراي بابامىز قازاق ءبىلىم- عىلىمىنىڭ دامۋىنا زور ۇلەس قوستى. وعان دەگەن قۇرمەتىمىز شەكسىز. بيىل راسىندا دا تاريحقا تاعزىم ەتۋ جىلى بولىپ تۇر. ماۆزولەيدىڭ جاڭا كەيىپكە ەنۋى سونى ءبىر دالەلى»، - دەدى وبلىستىق ارداگەرلەر كەڭەسىنىڭ ءتوراعاسى ك. ۇكى ۇلى.

 

شارالار لەگى ە. ءومىرزاقوۆ اتىنداعى وبلىستىق فيلارمونياداعى «تۋعان جەر - تۋعان ەل»: ءبىلىم بەرۋ جۇيەسىن دامىتۋ باسىمدىلىعى» تاقىرىبىنداعى عىلىمي- پراكتيكالىق كونفەرەنتسيامەن جالعاسادى. جيىنعا وبلىستىق ءماسليحاتتىڭ، اكىمدىكتىڭ، «نۇر وتان» پارتياسى فيليالىنىڭ وكىلدەرى، باسقا دا مۇددەلى مەملەكەتتىك ورگاندار، وبلىستىڭ جوعارى وقۋ ورىندارىنىڭ رەكتورلارى، پەداگوگيكالىق قوعام قاتىسادى دەپ كۇتىلۋدە.

 

سونداي-اق، «توبىل» مەيرامحاناسىندا وبلىس اكىمىنىڭ پەداگوگتارمەن كەزدەسۋى وتەدى.