10:44, 04 - قازان 2017 | GMT +6
الماتىلىق زووباق مۇشكىل حالدە پايدالانىلعان ارىستاننىڭ كۇشىگىن ساتىپ الدى
الماتى. قازاقپارات - زووباق باسشىلىعى ناۋقاس جانۋاردى جەكەمەنشىك يەلەرىنەن ساتىپ الدى، دەپ حابارلايدى قازاقپارات ءتىلشىسى.
بۇل تۋرالى زووباق ديرەكتورى ەرجان ەركىنبايەۆ فەيسبۋكتەگى پاراقشاسىندا مالىمدەدى.
«بۇگىن ارىستاننىڭ كۇشىگىن قابىلدادىق. ءاليدى 2 اي بۇرىن بۇرىنعى يەلەرىنەن ساتىپ العان بولاتىنبىز. وسى ۋاقىتقا دەيىن جانۋار ەم قابىلدادى.
بۇرىنعى قوجايىندارى جانۋاردى كۇتىپ باپتاماعان. اليدە راحيت بەلگىسى ايقىن، اعزالارى ۋلانعان، باۋىرى 3 ەسە ۇلكەيگەن، تىرناقتارى تۇبىنەن كەسىلگەن، جامباسى سىنعان. قازىر اقىرىنداپ سالماق جيناپ كەلەدى. ول ءۇشىن كۇرەسەتىن بولامىز»، - دەدى ە. ەركىنبايەۆ.
ايتا كەتۋ كەرەك، بۇرىنعى قوجايىندارى ارىستاننىڭ كۇشىگىن فوتوسەسسياعا پايدالانىپ اقشا تاپقان. جانۋارلاردى قورعاۋ ۇيىمدارىنىڭ وكىلدەرى جىرتقىشتىڭ مۇشكىل ءحالىن ايتىپ دابىل قاققان بولاتىن.
