مينيسترلىك اۋە اپاتىندا قازا بولعان دارىگەرلەردىڭ نە ماقساتتا ۇشىپ شىققانانىن مالىمدەدى

استانا. قازاقپارات - ق ر دەنساۋلىق ساقتاۋ مينيسترلىگى اۋە اپاتىندا قازا بولعان دارىگەرلەردىڭ ەسىمدەرىن اتادى، دەپ حابارلايدى قازاقپارات.

«اۋىر حالدەگى جۇكتى ايەلگە كومەك كورسەتۋ ءۇشىن 3 -قازان كۇنى ساعات 18.39-دا الماتى قالاسىنان شىمكەنت قالاسىنا سانيتارلىق اۆياتسيا بريگاداسىنىڭ 2 دارىگەرى، اتاپ ايتقاندا، پروفەسسور، اكۋشەرلىك، گينەكولوگيا جانە پەريناتولوگيا عىلىمي ورتالىعىنىڭ اكۋشەر- گينەكولوگ دارىگەرى پاتسايەۆ تالعار ءاناپي ۇلى مەن پروفەسسور، كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ رەانيماتولوگ-دارىگەرى ارتىقبايەۆ جانىبەك تۇكەن ۇلى ۇشىپ شىقتى.

بورتتا ناۋقاستار بولعان جوق. ۇشۋ رەسپۋبليكالىق سانيتارلىق اۆياتسيا ورتالىعىنىڭ كەلىسىمشارتى نەگىزىندە «ەast Wing»  اۋەكومپانياسىنىڭ «ان-28» ۇشاعىندا جۇزەگە اسىرىلدى.

ۇشاقپەن بايلانىس جويىلىپ، كەيىن ول الماتى قالاسىنىڭ ماڭىنان تابىلدى. بەس ادام قازا بولدى.

ق ر دەنساۋلىق ساقتاۋ مينيسترلىگى قىزمەتتىك مىندەتتەرىن ورىنداۋ بارىسىندا كوز جۇمعان مەديتسينالىق قىزمەتكەرلەردىڭ وتباسىلارىنا قايعىرا كوڭىل ايتادى جانە مورالدىق، ماتەريالدىق كومەكتەر كورسەتەتىن بولادى»، - دەلىنگەن ۆەدومستۆونىڭ حابارلاماسىندا.

بۇعان دەيىن حابارلاعانىمىزداي، 3 -قازان كۇنى الماتى-شىمكەنت باعىتىندا سانيتارلىق اۆيارەيسىن ورىنداعان «ان-28» ۇشاعى ساعات 18:47-دە الماتىدان 28 شاقىرىم قاشىقتىقتا روداردان جوعالىپ كەتتى.

ساعات 19.15-تە ۇشاق الماتى وبلىسى ىلە اۋدانىنىڭ مەجدۋرەچينسك اۋىلى ماڭىندا اپاتقا ۇشىراپ، ورتەنگەنى حابارلاندى. بورتتا بولعان 5 ادام قازا بولدى.

ازاماتتىق اۆياتسيا كوميتەتى ۇشاقتا بولعان ەكيپاج مۇشەلەرىن اتادى - اۋە كەمەسىنىڭ كاپيتانى قىرعىزستان ازاماتى - گ. ن. سوي، ەكىنشى ۇشقىش قازاقستان ازاماتى ە. كۋتافين.