شىعىس قازاقستاندا «تارباعاتاي جۇلدىزدارى» حالىقارالىق ءان فەستيۆالى ءوتتى

استانا. قازاقپارات -  شىعىس قازاقستان وبلىسىندا «تارباعاتاي جۇلدىزدارى» حالىقارالىق ەسترادالىق ءان فەستيۆالى ءوتتى.

رۋحاني قۇندىلىقتاردى دارىپتەپ، شەت ەلدەردە تۇراتىن قانداستارمەن مادەني- دوستىق قارىم- قاتىناستى نىعايتا تۇسۋگە باعىتتالعان بايقاۋعا بيىل 50 شاقتى ونەرپاز قاتىستى. ۇلى دالامىزدىڭ ءار وڭىرىنەن وزگە، قىتاي، رەسەي، موڭعوليا جانە قىرعىز ەلدەرىنەن كەلگەن جاس تالانتتار ءوزارا باق سىناستى.

 جۇرەكتەرى لۇپىل قاققان جاس ونەرپازدار ساحناعا شىعۋ ءۇشىن تىڭعىلىقتى دايىندىق ۇستىندە. ۇكىلى ءۇمىت جەتەلەگەن ولار حالىقارالىق بايقاۋدا توپ جارۋدى كوزدەيدى. قاتىسۋشىلاردىڭ ىشىندە قازاققا كەلىن بولىپ تۇسكەن ورىس قىزى ەكاتەرينا دا بار. سايىستىڭ دەڭگەيى جوعارى بولعانىن ايتادى.

ەكاتەرينا بەيسەمبايەۆا، شەمونايحا اۋداندىق مادەنيەت ءۇيىنىڭ ءانشىسى:

- اۋداننان 2 ادام كەلدى. مەن جانە رايسوۆ نۇربولات. مەن گۇلميرا سارينانىڭ «شىعىستىڭ شىرايلى ەلى» دەگەن ءانىن ورىندادىم. سودان كەيىن نۇربولات ەكەۋمىز «بالا ماحاببات» دۋەتى. رەپەرتۋارىمدا 30 دان استام قازاقشا ءان بار. ءبىراق حالىق اندەرىنەن كوپ ايتامىن.

وسىمەن 5- رەت ۇيىمداستىرىلىپ وتىرعان فەستيۆال بيىل اۋدان ورتالىعىندا ەمەس، اقجار اۋىلىندا وتكىزىلىپ وتىر. «ونداعى ماقسات -  شەتەلدىك قوناقتارعا ەلىمىزدىڭ جەتىستىكتەرىن پاش ەتۋ بولسا، ەكىنشىدەن، شالعاي اۋىلداعى حالىقتىڭ رۋحىن كوتەرۋ»، -  دەيدى ۇيىمداستىرۋشىلار.

ايتولقىن باقىت قىزى، بايقاۋعا قاتىسۋشى /موڭعوليا/:

- ورىنداعانىم -  «انا تۋرالى باللادا»، ەكىنشى ورىندايتىنىم -  «ءاليا» ءبىز ەل، جەر كورەمىز، بارلىعىمەن تانىسامىز. وسى جاقتان كورگەنىمىزدى ەلىمىزگە بارىپ، كوركەمدەپ بەرەمىز.

ەرجان سابىربايەۆ، قازىلار القاسىنىڭ ءتوراعاسى:

- «رۋحاني جاڭعىرۋ: بولاشاققا باعدار» باعدارلاماسىنىڭ اياسىندا، ەلباسىمىزدىڭ جولداۋىنان دا تۋىندايتىن ۇلكەن باعدارلامانىڭ ءبىرى رەتىندە جوعارعى دەڭگەيدە ءوتتى. تارباعاتايعا جان- جاقتان قانداستارىمىز كەلىپ، ەلىن، كوركەيىپ جاتقان تارباعاتايدى كورىپ، وزدەرى دە اڭ- تاڭ بولىپ وتىر. ءادىل قازىلار القاسىنا دا وتە قيىنداۋ بولىپ تۇر. سەبەبى بىلتىرعى دەڭگەيگە قاراعاندا، انشىلەرىمىز بيىل ۇلكەن دارەجەدە دايىندالىپ كەلىپ وتىر. ونەر بايگەسىندە تارتىنىپ قالعان ەشكىم بولعان جوق. وتان، تۋعان جەر، ماحاببات، دوستىق تۋرالى ادەمى اندەر اۋەلەدى. جۇرت كوڭىلىن كوتەرىپ، حالىقتى شاتتىققا بولەدى.

 قازىلار القاسىنىڭ شەشىمىمەن باس جۇلدەگە تارباعاتايلىق دارحان جولدىبايەۆ لايىقتى دەپ تانىلدى. وزگە دە ونەرپازدار ءارتۇرلى اتالىمدار بويىنشا ديپلومدارمەن ماراپاتتالىپ، سىي- سياپاتقا يە بولدى.

www.24.kz